AMEA-da yazıçı-publisist Yunus Oğuzun "Səfəvi Şeyxi" tarixi romanının təqdimatı olub

İyulun 4-də Azərbaycan Milli Elmlər Akademiyasının (AMEA) Nizami Gəncəvi adına Ədəbiyyat İnstitutunda yazıçı-publisist, dramaturq, tarixçi-alim Yunus Oğuzun “Səfəvi Şeyxi” tarixi romanının təqdimat mərasimi keçirilib.

AZƏRTAC xəbər verir ki, tədbiri açan AMEA-nın vitse-prezidenti, Ədəbiyyat İnstitutunun direktoru, akademik İsa Həbibbəyli Yunus Oğuzun çağdaş Azərbaycan ədəbiyyatındakı mövqeyindən danışıb. Bildirib ki, Yunus Oğuz müstəqillik dövründə Azərbaycan ədəbiyyatında tarixi romanın əsas yaradıcılarından biridir. O, tarixi mövzuda 10-dan çox romanın müəllifidir. Bu əsərlərdə Azərbaycanın dövlətçilik tarixi, milli dövlətçilik təfəkkürü, azərbaycançılıq ideyaları ön planda dayanır, aparıcı xətti təşkil edir. Həmçinin tarixlə bədii düşüncənin balansı ustalıqla gözlənilir, tarixi faktlar, reallıqlar qorunaraq bədiiləşdirilir.

“Ümid edirəm ki, yazıçının “Səfəvi Şeyxi” tarixi romanı onun digər əsərləri kimi ədəbiyyatsevərlər tərəfindən maraqla qarşılanacaq”, - deyə akademik İsa Həbibbəyli qeyd edib.

Təqdimat mərasimində AMEA-nın müxbir üzvü Tehran Əlişanoğlu “Yunus Oğuzun romançılığı: tarixdən belletristikaya” mövzusunda məruzə ilə çıxış edib. O vurğulayıb ki, yazıçı-publisist Yunus Oğuzun tarixi romanları müasir təfsir dilində verilib. Onun romanları hekayələr üzərində qurulub, onları tarixi hekayətlər də adlandırmaq olar.

Azərbaycanda Atatürk Mərkəzinin rəhbəri, akademik Nizami Cəfərov bildirib ki, yazıçının ustalığı, ilk növbədə, özünü tarixi həqiqəti olduğu kimi təqdim etməsində göstərir. Azərbaycanın dövlətçilik tarixində Səfəvilərin mövqeyi bir çox cəhətdən əlamətdardır ki, onlardan birincisi Azərbaycan türklərinin təbii olaraq məskunlaşdığı coğrafiyanı bütün miqyası ilə vahid hakimiyyət altında birləşdirmələridir. Orta əsrlərin sonlarına doğru xalqın mənəvi iradəsinin tarixi tələbi kimi meydana çıxan bu prosesin ideoloji əsaslarını Səfəvi sufi şeyxləri hazırladılar. Yunus Oğuzun yeni tarixi romanı məhz həmin mövzuya həsr olunub.

“Səfəvi Şeyxi” romanının yazıçının əvvəlki əsərlərindən üstünlüyü ondan ibarətdir ki, burada tarixin gedişinə daha çox diqqət ayrılır, habelə Üçkilsə ilə bağlı maraqlı məqamlara toxunulur.

“Şübhəm yoxdur ki, Yunus Oğuzun “Səfəvi Şeyxi” tarixi romanı Azərbaycan tarixi epopeyasını xeyli zənginləşdirəcək”, - deyə akademik Nizami Cəfərov vurğulayıb.

Azərbaycan Mətbuat Şurasının sədri, Milli Məclisin deputatı Əflatun Amaşov, Milli Məclisin deputatı, professor Elman Nəsirov, Azərbaycan Yazıçılar Birliyinin katibi, “525-ci qəzet”in baş redaktoru Rəşad Məcid, Dilçilik İnstitutunun direktoru, akademik Möhsün Nağısoylu, kitabın bədii redaktoru, yazıçı Elçin Hüseynbəyli Yunus Oğuzun “Səfəvi Şeyxi” romanının məziyyətlərindən danışıblar.

Vurğulanıb ki, Yunus Oğuzun qəhrəmanları tarixdən götürülsə də, onların arzuları, ideyaları bu günümüzlə səsləşir. Yazıçı Azərbaycan tarixinin auditoriyaya çatdırılmasında çox uğurlu bir yol seçib. Akademik kitablar tarixi faktlarla yüklü olduğundan onları qavramaq çətin olur. Amma Yunus Oğuzun tarixi romanlarında tarix anlaşıqlı, rəvan bir bədii dillə təqdim olunur. Onun əsərlərində tarixə yeni və fərqli yanaşma var.

Ədəbiyyat İnstitutunun əməkdaşları, filologiya üzrə fəlsəfə doktorları Lalə Həsənova, Elnarə Qaragözova və digər çıxış edənlər kitab haqqında fikirlərini bölüşüblər. “Səfəvi Şeyxi” romanının həm ədəbiyyatımıza, həm də tariximizə qiymətli töhfə olduğunu bildiriblər.

Sonda Yunus Oğuz çıxış edərək tədbirin təşkilində əməyi olan hər kəsə təşəkkürünü bildirib.

Ədəbiyyati qəzeti.- 2019.- 6 iyul.- S. 16.