Vətən sevdalısı...
Poemadan parçalar
Milli Qəhrəman,
şəhid Samid İmanovun əbədi xatirəsinə ithaf olunur
Proloq
Ey bu torpaq üçün torpağa düşmüş
əsgər!
Göydən əcdad
enərək öpsə
o pak alnı dəyər!
Mehmet Akif Ersoy
Ürəkdə Vətənə
eşqin atəşi
Süd ilə yoğrular, qan ilə gələr.
Vətən qarşısında
eşq imtahanın
Qəhrəman oğullar
can ilə verər.
Qəlbi ən ilahi eşq ilə vuran
Oğullar vətənin
görən gözüdür!
Şəhiddir ən uca zirvədə duran!
Bu adi söz deyil, Tanrı sözüdür!
Hər kəsə
öz canı şirin, əzizdir,
Ölümün gözünə dik baxmaq çətin.
Vətəni Samidtək
gərək sevəsən,
Gərək Samid kimi olasan mətin!
Cihada gedərkən
Samid bilirdi,
Ata var, ana var, Fidan
bala var.
Yolunu gözləyən
sevdiyi qadın,
Beşikdə uyuyan Turan bala var!
Atadan, anadan, baladan əziz,
Bacıdan, qardaşdan,
yardan da uca
Vətən var! Heç kimlə qiyasa gəlməz!
Heç kimçün
düşmənə Samid
əyilməz!
Bu yoldan kim onu döndərər, necə?!
Vətən də Allahtək ucadan, uca!
O, qəfil gülləyə tuş gəlmədi ki!
Canın atəşlərə çəpər
eylədi.
Əsgər dostlarını
qorumaq üçün
Sinəsin gülləyə
sipər eylədi!
Anası deyir ki, ağlı kəsəndən
Şəhidlik Samidin amalı olub.
Odur ki, xalqının sevgisi ona
Ana südü kimi halalı olub!
Anası Xuraman, ata Gülağa
Gözləri nəmlisə,
fəqət, qürurlu!
Samidtək igidin ata-anasın
Dindirib dinləmək
necə ağırdı!..
***
Samid doğulan kənd yetmiş yaşında,
İki qəhrəmanı
bu kəndə qürur!
Həsən kişi tikib ilk evi burda,
Uçub-sökülməyib, hələ
də durur!
Samid məktəbliydi,
Zakir Məcidov
Bu kənddən
ilk Milli Qəhrəman
oldu.
O gündən qəlbində Vətən
sevgisi
Adi eşq olmadı, din, iman oldu!
Sevərdi Səhhətin
"Vətən" şeirini,
Bu şeiri
söylədi, yəqin,
son kərə.
Bu şeirin sədası yayıldı
o gün
Baxdığı səmaya,
durduğu yerə!
Vətən sevdalısı
oğuldu Samid,
Bu eşqdən güc alıb boy atdı hər gün!
Vətən fədaisi
doğuldu Samid...
Ey Vətən, Samidlə fəxr eylə, öyün!
Bu elin-obanın əzizi Samid,
Onunla fəxr edir dostu, tanışı.
Bu eldə hər evin övladıdır
o,
Burda hər kəs onun qohum-qardaşı!
Hamının qəlbində
xatirəsi var
Dediyi hər kəlmə, sözü də əziz!
Toxunduğu ağac,
toxunduğu daş,
Torpaqda ləpiri,
izi də əziz!
Adına məktəb
var, yəqin ki, bir gün
Samidin heykəli burda ucalar.
Təzədən doğular
bu yer üzünə
Ömr edib, tarixlə birgə qocalar.
***
"Onları
harda görsəniz, öldürün. Sizi çıxardıqları yerdən siz də onları çıxardın".
Bəqərə-191
Müqəddəs duyğudur
düşmənə qarşı
Döyüşmək, vuruşmaq
can verənədək.
Din üçün,
namusçun cihad eyləmək,
Vətən işğalına
son verənədək!
Samidin fikrindən
çıxmırdı heç
vaxt -
Vətəni tam görmək
ulu arzusu!
O da and içmişdi Mübariz kimi,
Candan da əzizdir Vətən namusu!
Millətin rəmzidir
hər igid əsgər,
Səngərdi, sipərdi yurdun önündə.
Siyrilmiş qılıncdı,
çəkilmiş oxdu
Qələbə müjdəli
ordu önündə!
Vətəni qoruyan mələkdi onlar,
Əsgər geyimində
çiçəkdi onlar,
Həmişə Vətənə
gərəkdi onlar
Səngərdə keşikdə duran əsgərim.
Kiminə oğulsuz, kiminə nəvə.
Qız belə
oğulu gərəkdi
sevə!
Qələbə çalaraq
qayıdın evə,
Səngərdə keşikdə
duran əsgərim!
Seyid Mübarizin qardaşlarısız,
Samidin, Fəridin yoldaşlarısız.
Vətən sevgisiylə
hər vaxt coşunuz,
Səngərdə keşikdə
duran əsgərim!
***
Nələr düşünürdü,
görəsən, Samid,
Vətən torpağına qanı axdıqca?
Zirvədən Vətənə
baxırdı Samid!
Hər yanda üçrəngli bayrağımızdı,
Hər yanda müqəddəs torpağımızdı!
Bunları görürdü
hara baxdısa!..
Neçə dost ölkədə
təlim keçmişdi,
Qalibiyyət dərsi
almışdı Samid!
O, Vətən uğrunda şəhid olsa da,
Qalibdi, qələbə
çalmışdı Samid!
Öldü yazmayacam,
Samid ölmədi!
Ona yaraşmayan acı kəlmədi...
Sevdiyi torpaqda susub əbədi,
Beləcə, xəyala
dalmışdı Samid!
Ruhun Ruh sahibi göyə çağırdı,
Əbədi ayrılıq
yaman ağırdı!
Ağlı kəsən
gündən arzulayırdı,
Şəhid olacağın
bilmişdi Samid!
Atana, anana təsəlli çətin,
Sənə hər yanana təsəlli çətin!..
Samid yetirən xalq, mətin ol, mətin!
Qəlblərdə əbədi
qalmışdır Samid!..
Samid də Kərbəla şəhidləritək,
Ruhuyla, canıyla
Allah aşiqi!
Cismiylə, qanıyla
Allah aşiqi!
Geyindiyi paltar kəfəndi ona.
Tanrıtək əzizdi
Vətən də ona!
***
Aprelin dördündə
şəhid olmuşdu,
Aprelin doqquzu torpağa düşdü.
Samidin öncədən
nişan verdiyi
Məzarçün atası o yeri seçdi.
Torpaq şərəfləndi
həmən o gündən,
Qoynuna qəhrəman şəhidi
aldı.
Hər yerə
belə bəxt qismət olmaz ki!
Bu torpaq əbədi müqəddəs
qaldı.
O gün Neftçalaya axışdı
hamı,
Xalq öz şəhidiylə vidalaşmağa
Qürurlu gəlirdi,
toxdaq gəlirdi
Xalq öz igidiylə vidalaşmağa.
Onu son mənzilə
götürən əllər
Birliyə səsləyən bağa
dönmüşdü.
Dikələn, sadəcə,
məzar deyildi,
Torpağın ürəyi dağa dönmüşdü.
***
Məzarı İsmili
məzarlığında, -
Döyüşə müntəzir, farağat durur.
Mərmər üstündəki
şəkli olsa da,
Ürəyi susmayıb,
ürəyi vurur!
Bizim sinəmizdə vurur o ürək,
Nə qədər
Vətən var, o qəlb atacaq!
Nə zaman Qarabağ azad olacaq,
Samid arzusuna o gün çatacaq!
Minlərlə ziyarət
edənin vardır,
Müqəddəs məkandır,
Samid, məqbərən!
Gündüzlər çiçəklər,
gecə mələklər
Ruhuna həyandı,
Samid, məqbərən!
Burdan işıq
parlar, qanı coşdurar,
Vətənə sevgini, eşqi daşdırar!
Kim deyir,
sadəcə qara daşdılar?
Qəlblərdə imandı,
Samid, məqbərən!
Xoşbəxt yaşamağın
açarı burda!
Qəhrəman əsgərin
məzarı burda!
Vətənin solmayan baharı burda!
Sabaha inamdı,
Samid, məqbərən!
Satqınlar, xainlər bura gəlməsin.
Burda işlətməyin
"ölüm" kəlməsin!
Qoy yağılar ölsün, igid ölməsin!
Əmr edir, zamandı, Samid, məqbərən!
Keşikdə dayanan bir əsgər kimi,
Mən də göz yummuram gör neçə gündür.
Sənin xatirəni
yaşatmaq üçün
Qəlbim kaman kimi danışdı,
dindi.
Bilirəm, qələbə
istəyir ruhun,
Sən təskin olmazsan şeirlə, sözlə.
Tökülən qanınız
bihudə deyil,
Qələbə yaxındır,
bir az
da gözlə!
***
Cihada gedərkən Samid bilirdi,
Ata var, ana var, Fidan bala var,
Yolunu gözləyən sevdiyi
qadın,
Beşikdə uyuyan Turan bala var
Nələr göz önümdən dolanır,
keçir...
Xəyalım döyüşlər
gedən məkanda!
Sanki dirisiniz, əmrə müntəzir,
Hücuma keçməyə
hazır bu anda!
Burda şəhid olan igid oğullar
Yenə keşikdədir sərhəd
boyunca.
Basaraq bağrına
Vətən torpağın
Öpüb-oxşayırlar ruhlar doyunca.
Şəhid dostlarıyla
Samid burdadır,
Qəti qələbəyə
əzmləri var!
Elmdar burdadır,
Fərid burdadır,
Ağır sınaqlara
dözümləri var!
Şəhid qanlarının
töküldüyü yer
Minlərlə igidlər doğuracaqdır.
Sabah, ya birigün Samid, Mübariz
Bizi son döyüşə
çağıracaqdır!
Şəhidlərin ruhu dolaşır burda
"Şəhidlər
ölməz ki, şəhidlər diri!"
Bir əlində silah, birində bayraq
Əmrə müntəzirdir
yenə hər biri!
...Ən böyük arzumdur son döyüş günü
Mən də ön sırada, ön xəttə olum.
Dağıdılan zaman düşmən sədləri,
Dağılan, uçulan
o səddə olum!
Görüm bayrağımız
qöfsi-quzehtək
Necə yarıb keçir şər zülmətini.
Əli bəy ruhunu şad-xürrəm görüm,
Görüm Məhəmməd
Əmin fəxarətini!
Yoxdan bayraq yapan, ucaldanların
Ruhları ön səddə duracaq o gün!
Əsgərlərlə birgə
şəhid ruhları
Düşmənə zərbələr
vuracaq o gün!
Göydəki ulduzlar
"səkkizguşəli",
Ay bütöv olacaq - nurlu, nəşəli!
"Heyratı"
deyəcək igid şuşalı,
Topxana toy-büsat
quracaq o gün!
Xətai o günə
"əhsən" deyəcək!
Nadir şah
"Bu canım qurban"
deyəcək!
Səttarxan Təbrizdən
"can, can" deyəcək!
Azərbaycan zəfər
çalacaq o gün!
Sevinc parlayacaq xalqın gözündə,
Bütövlük olacaq "Vətən" sözündə!
Tonqal qalanacaq Cıdır düzündə!
Tarixdə əbədi qalacaq o gün!
Fərhad Əzizbəyli
Ədəbiyyat
qəzeti.- 2019.- 13 iyul.- S.20-21.