Ağdaşda Əjdər Olun yaradıcılığına

həsr olunmuş tədbir keçirildi

Bu günlərdə Ağdaş rayon Mərkəzi Kitabxanasında Azərbaycan Yazıçılar Birliyi Ağdaş bölməsinin təşkilatçılığı ilə tanınmış şair, yazıçı, dramaturq Əjdər Olun yaradıcılığına həsr olunmuş tədbir keçirilib.

Tədbiri giriş sözü ilə Mərkəzləşdirilmiş Kitabxana sisteminin direktoru Seyfəddin Feyzullayev açaraq müasir ədəbi mühitdə layiqli yeri olan Əjdər Ol haqqında danışıb.

Sonra söz kitabxananın aparıcı işçisi Xuraman Məhərrəmovaya verilib. O, ədibin həyat və fəaliyyətindən, eləcə də milli poeziyamızda özünə məxsus yeri olan müəllifin şeirlərindən söz açıb.

Kitabxananın digər işçisi Könül xanım ədəbi camiənin tanınmış nümayəndəsi Əjdər Ol yaradıcılığında və çağdaş nəsrimizdə hadisə kimi qarşılanan portret hekayələrinin əsas məziyyətlərindən bəhs edib. Mədəniyyət mərkəzində fəaliyyət göstərən Xalq teatrının rejissoru X.Qəniyev ədibin dram əsərlərindən bəhs edib, gələcəkdə bu əsərlərdən birini səhnələşdirməyə çalışacağını qeyd etdi.

Oxuculardan Vüsalə Məmmədova, Aynur Çələbiyeva, Müşərrəf Alıyeva şairin şeirlərindən parçalar söylədilər.

Mərasim zamanı şairlərdən Cabir Həsənov, Dünyamin Məmmədov çağdaş ədəbiyyatımızın layiqli nümayəndəsi Əjdər Ola yaradıcılıq uğurları arzuladılar.

Sonda Azərbaycan Yazıçılar Birliyi Ağdaş bölməsinin sədri şair Fəxrəddin Əsəd tədbir iştirakçılarına Əjdər Olun salamlarını çatdırmış və yazıçının 15-ə qədər kitabını Mərkəzi kitabxananın fonduna hədiyyə etdi.

Tədbirdə yerli yazarlar, ictimaiyyət nümayəndələri iştirak ediblər.

Ədəbiyyat qəzeti.- 2019.- 8 mart.- S.32.