Azadlıqdan sonra...

Şeir deyil, çağırışdır

Yeni bir ölkə cahana gəlir,

İnsanlarının qəddi düzəlir,

Susuz torpaqları cana gəlir.

Mübarizə aparır, zəfər çalır.

Ev tikir,

yol salır,

bayrağı göyə ucalır!

Bəzilərini arxayın salır -

Canında "mənəmlik" artır,

özünü dartır.

Zəfərdən sonra həmişə

belə boşluq olur.

Arxayınlıq, məstlik,

bir az sərxoşluq olur.

O günlərə dözmək lazımdır.

O zamanı keçmək lazımdır.

Çıxacağın sahili

yaxşı seçmək

lazımdır.

Azadlıq vətənin nəfəsidir,

nəfəsi!

Azadlıqdan sonra hər kəsin

Azadlıq istəməsi

- naşılıqdı!

Xaosdu,

özbaşınalıqdı!

Bu yerdə mübarizə

Dönüb sənin savaşın olacaq,

Savaşdığın sənin öz vətəndaşın olacaq.

Qazandığınız yadlar əlində

daş-qaş olacaq.

Sənə qalan balalarının

gözündəki yaş olacaq.

Vətən torpağın əllərdə daş olacaq.

Belə sathasatda,

alhaalda,

ən yaxşı halda,

Vətənin böyük bir ölkəyə

kiçik "qardaş" olacaq.

Bu yolda olmuşuq,

dadını bilmişik.

Bir dəfə ölmüşük,

dirilmişik,

Yenidən dünyaya gəlmişik!

Hamımız bir torpaqdan,

bir candan,

bir qandanıq!

Dünyanın harasında olsaq

Biz Azərbaycandanıq!

Əzizlərim,

Yadınızda qalsın bu sözlərim!

Azadlıqdan sonradır

yolun ən çətini.

Azadlıqdan sonra sınayırlar

Xalqın ağlını, gücünü, qeyrətini.

Azadlıqdan sonra

Gərək hamımız ayıq-sayıq olaq,

O gözəl azadlığa layiq olaq.

Ona sahib olaq,

Onu başımızdan yuxarıda tutaq.

Hər cür mənafeni unudaq.

Babalarımızın ruhu oyanıb,

Başımızın üstündə dayanıb,

Bayrağımızın qırmızısı,

Şəhidlərimizin qanı ilə boyanıb.

Gələcəkdən boylanıb nəsillərimiz,

bizi izləyir.

Bizdən təmkin, hünər, zəfər

gözləyir.

Daha şanlı illər,

daha gözəl nəsillər gələcək.

Əl-ələ versin keçmiş,

bu gün,

gələcək,

Hamımız bir can olaq!

Hamımız azad bir Azərbaycan,

Azərbaycan, Azərbaycan olaq!

Davam olacaq

Nə qədər bu dünya, zaman olacaq,

Heç vaxt sönməyəcək bu od, bu ocaq.

Atama ər - deyən - Anam olacaq.

Oğlumun, qızımın anası - yarım.

Siz rahat uyuyun ey ulularım,

Bu zəncir həmişə davam olacaq,

Bu diyar həmişə yuvam olacaq.

Sənə şükür olsun, ey ulu Tanrım.

11.02.2019

Fikrət Qoca

Ədəbiyyat qəzeti.- 2019.- 8 mart.- S.9.