Türk Ədəbiyyatı Fondu tərəfindən

“Yaşayan Dədə Qorqud” ödülü Azərbaycan

Xalq şairi Sabir Rüstəmxanlıya təqdim olunub

Türk Ədəbiyyat Fondunun “YAŞAYAN DƏDƏ QORQUD” mükafatına, Direktorlar Şurasının qərarına əsasən, ömrü boyu Türk mədəniyyətinə xidmət edən, Sovetlər Birliyi dövründə rejimin bütün təzyiqlərinə baxmayaraq, əsərləri ilə milli ruhu canlandıran, milli köklərə söykənən şeirləri ilə yeni nəsillərə türk kimliyini aşılayan, Azərbaycanı azadlığa aparan Meydan hərəkatının liderlərindən biri, Azərbaycanlı şair – yazıçı SABİR RÜSTƏMXANLI layiq görülüb. SABİR RÜSTƏMXANLI Azərbaycanda , Türkiyədə , Rusiyada , İranda, Almaniyada, İngiltərədə, Özbəkistanda, Gürcüstanda nəşr edilmiş onlarla kitabın müəllifidir.

Mükafatı Bakıya qonaq olan vəqfin rəhbəri Serhat Kabaklı, eləcə də iki məsul əməkdaşı, yazarlar – Bahtiyar Aslan və İmdat Avşar təqdim etmişlər.

Türk dünyasının bu nüfuzlu mükafatı ilə yanaşı, Xalq şairinə “Dağların Ruhu” (Sabir Rüstemhanlı ile söyleşi) adlı kitab da təqdim edilib. Kitabın müəllifi yazıçı Bahtiyar Aslandır. S.Rüstəmxanlı ilə müsahibələr əsasında yazılan kitabda xalq şairi və millət vəkilinin Türk dünyası ilə bağlı düşüncələri, dünyada gedən ictimai-siyasi-mədəni proseslərlə bağlı baxışları yer alıb. Həmçinin Xalq şairinin həyat və yaradıcılığından ətraflı bəhs olunub. Kitabın sonunda S.Rüstəmxanlının fəaliyyətini əks etdirən foto albom təqdim edilib.

Ədəbiyyat qəzeti.- 2020.- 12 dekabr.- S.24.