Qardaşlarımıza güc

göstərənlər bilsinlər ki…

Azərbaycanla bağlı son günlər yaşananlar bizi də narahat edir. Bütün dünyanın pandemiya ilə mübarizə apardığı bir dönəmdə qardaş ölkəmiz Azərbaycanın belə bir müharibəyə cəlb edilməsi əsla qəbuledilməzdir. Qanımız, canımız, dilimiz bir olan qardaş Azərbaycan xalqına səbir və mətanət diləyirik. Erməni işğalçılarının Azərbaycanın Tovuz bölgəsi sərhəddində törətdikləri təxribat nəticəsində şəhid olan general Polad Həşimov, polkovnik İlqar Mirzəyev və bütün şəhidlərin ruhları şad olsun. Biz onları öz xalqının əsl qəhraman və igid oğulları olaraq qəbul edirik. Azərbaycanda bizim qardaşlarımız olan şair və yazarlar var ki, onlar Azərbaycan və Qazaxıstanın qardaş olduqlarını hər zaman tərənnüm edirlər. Biz onlar üçün də narahatlıq keçiririk. Azərbaycandakı qardaşlarımdan biri də tanınmış şair Xəyal Rzadır. Onun doğulduğu torpaqlar indi erməni işğalı altındadır. Öz doğulduğu şəhəri xatırlayarkən gözləri dolar, hisslərini cilovlaya bilməz və düşmən əlində qalan torpağı üçün duyğularını şeirə çevirər. O, ötən il Qazaxıstanda təşkil edilmiş Beynəlxalq Ədəbiyyat Forumunda “Uşaqlar, müharibə və ədəbiyyat” mövzusunda çıxış etdi. Forum iştirakçıları, müxtəlif ölkələrdən gəlimiş önəmli qələm adamları onun çıxışının təsiri altında qalmışdı, bütün salon göz yaşlarını saxlaya bilməmişdi. Xəyal Rza uşaqlıqdan silah səsi ilə böyüyən bir şairdir. Onun üçün müharibəyə daha dərin baxışı bu fərqi yarada bilir. Biz onun və digər qardaşlarımızın öz ölkəsində rahat olmasını, erməni təcavüzündən uzaq olmasını istəyirik. Allahın izni ilə ədalət öz yerini tapacaq. Qardaşlarımıza qarşı alçaqca siyasət yeridən, təcavüzdə bulunan istənilən ölkəyə qarşı biz də onlarla birgə olduğumuzu ifadə edirik.

Akberen Elgezek

Şair, Qazaxıstan Yazıçılar Birliyinin I katibi

Ədəbiyyat qəzeti.- 2020.- 18 iyul.- S.18.