Azərbaycan torpaqlarının səhər duası

Ey göydəki elçim,

Yanır içim.

Nə qədər düşünüm, ölçüm, biçim?!

Kürün ağzını döndər,

Mənə göndər.

Kürü içim!

Ulu Öndər!

Ya da oğlunu göndər.

Zaman üçün,

Odur seçim.

O yerlər yağışa, qışa, qara bağlı...

Qoy aranlı-dağlı

Hamımız olaq Qarabağlı!

Aranlarım, şoranlarım,

Cənnət bağlı olsun,

Həm də haqlı olsun.

Hər dərdimizin əlacı olacaq.

Yoxsa şoran torpağa

Nə əksək barı acı olacaq.

Oğlun üçün ağrılı, çətin, acı olacaq.

Amma özü başımızın tacı olacaq.

Yaradana çatdır,

Arzumuzu, orda yaxından.

Yoxsa əl çəkən deyilik yaxandan...

İmza: Bütöv Azərbaycan torpaqları

- Biz dedik,

Fikrət Qoca yazdı.

Yer kürəsinin

oxu laxlayıb

Dünyanın oxu laxlayıb,

Allah bizi "haq" deyilən,

Nazik bir sapın ucunda saxlayıb.

Aşağıda sonu görünməyən sonsuzluq,

Sapda toxluq, aclıq, susuzluq

Xülasə, əxlaqımıza görə

qoyduğumuz həyat

Ətrafda qoynuna ulduzlar səpələnmiş

Nurlu, yaraşıqlı kainat.

Səyyarələr saya gəlməz qədər çoxdu

Amma qaçıb sığınmağa

Bir adam boyu yer yoxdu.

İntihara da yoxdu ixtiyarım,

Məni dünyaya qadın gətirmişdi,

Ona görə sənə sığınıram yarım.

Fikrət QOCA

Ədəbiyyat qəzeti.- 2020.- 28 noyabr. S. 5.