Vətən savaşı

Sənin intizarına

qurban olum, ay ana,

Gözlərin yollardadır,

qulağın səksəkədə.

Sənin ağrılarına

dərman olum, ay ana,

Oğlun haqq savaşında

döyüşür ön cərgədə.

Bu gün Vətən dardadır,

yollanmışıq cəbhəyə,

Gücü çatmaz düşmənin

qəddimizi əyməyə.

Göy titrəyir, yer yanır

Bu Vətən savaşında.

Qan yaddaşım oyanır

Yurdun hər qarışında.

Bayrağında qanının

Rəngi var şəhidlərin.

Əsirgəməz canını

Savaşda igidlərin.

Qarabağım, Xan bağım,

Nigarandır torpağım.

Şuşanın dağlarına

Sancılacaq bayrağım.

Biz türk oğlu türklərik,

Sakit yatmış şirlərik.

Düşmən qoy unutmasın,

Ona aman vermərik.

Müzəffər, məğrur Ordum

Vurub keçir sədləri.

Düşmən çaş-baş qalıbdır,

Bağlanıb sərhədləri.

Bu gün sən qəhrəmansan,

İgid oğul anası.

Dik tut məğrur başını,

Ey mərd oğul atası.

Sil qəlbindən qüssəni,

Vida et göz yaşına.

Sevincin mərmi kimi

Düşsün düşmən başına.

Düşmən yasa batdıqca

Sən güləcəksən, Vətən.

Sən qalib gələcəksən,

Yüksələcəksən, Vətən!!!

İlhamə Dağlı, Kənan Hacı

Ədəbiyyat qəzeti.- 2020.- 3 oktyabr.- S.15.