Elşən Mehdinin doğum

günü təbrikinə "Ön söz"

Bahardı...

Səhərdi...

Ömrümə sıxdığım güllələrin boş gilizlərini

siqaret kötüklərini,

tullayıram

əlimin tərsiylə.

O mahnı, qrammafondakı o mahnı

həmahəngdir

fikirlərimin rəqsiylə.

Havalanmaq, nəşələnmək qorxusuyla,

gürcü çaxırının qoxusuyla, iyiylə

bərabər yaşayır

damağımın damı altında

sözlər, sükut və sairə...

Eşq olsun şairə!

İndi tərgitmişəm bütün bu vərdişləri,

yəni bitib başqa bir şairin

intihara cəhdləri, sərgüzəştləri...

İndi siqaretsiz şair dodaqları

Eyfelini itirmiş Parisə,

qədəhlər Boğazı qurumuş İstanbula bənzəyir,

Eşq olsun sənə, şair!

Bahardı...

Səhərdi...

Nə qərbində,

nə də şərqində otağımın yenilik yoxdur,

başımda da həminki qəribəlik, qəriblik.

Pəncərədən baxıram.

Baxıram buludların dəvə ləngərinə -

ən dahi rəsmlərin

ən adi həyat səhnəsinə bənzərliyinə,

Salvador Dalinin acı məğlubiyyətinə.

Dodağımdakı qüssəli təbəssümü

qədim bir gülüşün təqlidi sanıram.

Suallar açıq qalır...

Dəvə buludlar

belindəki suları

uzaq, susuz başqa səhralara daşıyır.

Səma açılır...

Bahardı...

Səhərdi...

Qaranquşlar soyuq ölkələrdən

yorğun dönüblər,

günəşi daşıyıb bizə gətiriblər.

Külək saçlarını qurudur

ağacların.

Güllər arıların,

qəndqabılar qarışqaların

ümid yeridir bir az.

Pəncərələr, qapılar doxsan dərəcə

bahara açılıbdır.

Nümayişdir-nədir, bilmirəm,

amma ətraf

sənin kitabında belə

rəngini dəyişir.

Eşq olsun sənə, şair!

Bahardı...

Səhərdi...

Bədənimin ən əziz qonağı ruhum

ustadın şeirləriylə dincəlir.

Mətləblər vaxt ötdükcə hökmən incəlir.

Yadıma gəlir

səninlə tanış olanda

yüzlərlə ortaq dostlarımız var idi:

kitablar -

onlar gecələr yenə boylanırmı rəfdən?

Söyləyirmi ki, Elşən,

sən bizi də oxumalısan?!

İndi fərq etmir

talemi insanı, insanmı taleni seçir?

Yaxşı ki, səni tanımışam,

Yaxşı ki, sən varsan,

Yaxşı ki, bu fani dünyaya göz açmısan -

ağlayaraq...

Üzülmə,

ağlamaq ilk nəğməsidir

insanların,

şairlərin ilk şeiridir.

Sən ilk şeirini çoxdan yazmısan...

Bahardı...

Səhərdi...

Kazım KAZIMOVİÇ

Ədəbiyyat qəzeti.- 2021.- 18 dekabr.- S.3.