Anamız Azərbaycan

Keçdikcə aylar, illər,

Başlayır cücərməyə

Dedi-qodulu dillər:

- Deyirlər ki... deyirlər.

Bu yeni ev tikənlər

Bünövrəni yeyirlər!

İşdən qovulan nazir,

Deyirlər Həccə gedib,

Orda ibadət edib.

Ona "vergi" verilib!

- Orda da vergi yığıb?

Gör necə adət edib?

Dinc dayanmır ki, dillər...

Deyirlər ki... deyirlər:

Əlqulunu tutublar,

Pulları xaricdədi.

Pullar orda işdədi,

Özü burda küncdədi.

Bəli, bu var, doğrudu,

Bu bir gerçəkdi, gerçək!

Qanun işin görəcək!

Cəzasını verəcək!

Deməyin, biz adiyik,

Bu odlar diyarıdı,

Biz odlar övladıyıq!

"Odlu diyar" deyilən,

Müqəddəs adımız var.

44 günlük döyüşlə

Yer üzünü çaşdıran,

Müzəffər ordumuz var!

Biz lazım olan zaman

Əl uzadıb hamımız,

Böyük bir can olarıq!

Hamımızın anamız

Azərbaycan olarıq!

21.02.2021

Eşq Allahın ruhundadır

Heç bilmirdik... Kimik? Hardan?

Cənnətməkan bir diyardan

Bu dünyaya gələn kimi

Ağlamışıq.

Gözümüzü açdı bizim

O eşq adlı gözəl işıq.

İlk gördüyüm ilk canlıya,

Elə ona - dedik ana.

Anamıza olduq aşiq.

Bu eşq ilə yaşamışıq.

Eşq Allahın ruhundandı,

Onun qədrin kim bilər ki,

İnsan qədər!

İnsan oğlu

Eşqdən gəlir bu dünyaya.

Eşqlə yaşar, eşqlə gedər.

23.02.2021

Fikrət Qoca

Ədəbiyyat qəzeti.- 2021.- 27 fevral. S. 3.