Bizim həyətin...

Bizim həyətin mənzərəsi bambaşqadır

Kəpənəklər yonca güllərinə,

Yonca gülləri

Yayın xəzrilərinə dirsəklənir.

Baxışlar yonca kollarında oturub

Sanki yelləncəkdə yellənir.

Bizim həyətin mənzərəsi bambaşqadır

Üzüm tənəki heyva ağacına dolanır,

Heyva ağacının qalın budağı

hasarımızdan sallanır.

Təzə boy verən şitillər,

Kölgəsində dincəlirlər

Ağacların.

Bir rəssam istəyir çəkə gözəlliyini

İnsan qəlbindəki bu baharın.

Bizim həyətimizin mənzərəsi bambaşqadır

Sevgi ağaclar üçün torpaqdan,

Quşlar üçün budaqdan,

Kəpənəklər üçün yarpaqdan

Tutub yalvarır,

Nə olar, tərk etməyin məni.

Eşq tətiyiyəm...

İlan kimi qabığımdan bu dəqiqə çıxmışam,

Sanki təzədən doğulmuşam.

İndi-indi öyrənirəm qığıltıları,

Qulağımda danın qapısının cırıltıları

Günəşin telləri səpilib üzümə

İşıq axır pəncərəmə gülüşlərindən.

Ruhunu ruhumla sevməm

Özümü sevdirir mənə.

Tanrı da dostu kimi baxır özünü sevənə.

Özümü tapıram səndə

Sevgi adlı şəhərin

Ümid adlı küçələrində

Labirintdisə də arzular,

Şükür məndən öndə mənə mayak olan

Sevgin var.

Bu bəs edir uduzanda sıfırdan başlamağa

Bu bəs edir hər şeyi yenidən yaşamağa.

Eşq tətiyiyəm bu gün,

Çəkilirəm sevgidən atəş açmaq üçün.

Bağışla

Bağışla, İlahi,

Şeir yazıram,

İşinə qarışıram!

Sən yaratdığın yer

Daha o yer deyildir.

İndi artıb şeytanlar,

Hər il Kəbədə daşatma mərasimində,

Kaş öz qəlblərinə daş ata insanlar.

Bəlkə, yıxıla şeytanın koması,

İndi qəlblərdə sənə yer yox,

Qəlblər şeytan yuvası!

Bağışla,

Yerlərin, göylərin əfəndisi!

Yazmaya bilmirəm,

İşinə qarışıram, bilirəm.

Bir adın bağışlayandır deyə

Sanma sui-istifadə edirəm.

Mən bəşərəm

Bəşərdə hər şər,

Saçımdan iliyiməcən

Əza-əza məndə qəza törədər.

Yıxılanı qaldırmaq

Görəvimizkən yer üzündə,

Başından basırıq bəlkə də,

Görürsən də.

Axı sən şahidsən.

Şəhadət verəcəksən əməllərimizə

Əməllərimiz əlcək ola bilmir əllərimizə.

Hansı üzlə döyəcəyik qapını,

Hansı ümidlə keçəcəyik siratını.

Bizə Qırat da olsa köməyi dəyməyəcək,

Biz o atların ayaqlarını çoxdan kəsmişik.

Biz nəinki sənə

Özümüzə də dönük düşmüşük.

Sən bağışlasan da bizi

Ruhun tərəzisi

Bədənimizi çəkəndə

Mütləq nəsə əyiləcək bir gözündə.

Sən qoru sabahımızı, Tanrım!

Mən Səni dünyanın qoruyucusu kimi tanıdım.

Tanıqlığın son ana qədərdi bilirəm,

Mənim şahidliyim bura qədər

Qəbul etsən, sevinərəm.

Yaşıl işıqlar

Bu labirint küçələrdə

Yolu tapmaq özü ibadətdi.

İbadət itaət,

İtaət sədaqət,

Sədaqət səadətdi -

Ruhun səadəti.

Qrimlənmiş üzlərdə

Sədaqət gəzmək

Susuz quyuya vedrə sallamaqdı

Və könülsüzə könül bağlamaqdı.

Bağlanmaq yaşamaqdı azad,

Yaşamaq sevməkdi.

Sevmək birinin uğruna ölməkmi?

Yox,

Sevmək uğura yaşamaqdı.

Bu labirint küçələrdə

İşıqforlar,

Yolu deyil, yolçuları tənzimləmək üçündü.

Yaşıl işıq

Əslində, həyəcanı ötürmək üçündü.

Bizi də ötürən bu yaşıl işıqlar,

Kaş labirint boyu yana

Yolu tapmayana

Ümiddi hardasa bu yaşıl işıqlar.

İnanıram

İnanıram nə vaxtsa,

qayıdacağıq bu torpaqlara

Çiçək kimi,

ot kimi,

ağac kimi,

adam kimi.

İnanıram necə olursa-olsun,

qayıdacağıq,

oyadacağıq yeri.

Görəcəyik ruh necə bar verir.

İnanıram,

bədənin diriləcəyinə,

öləcəyinə ruhun.

İnanıram bu oyunun,

sonda 1:0 qələbəylə

xeyrimə bitəcəyinə.

Siz də inanın,

İnam daşı dilləndirər

başından yıxılmasa ayaqlar.

Bu tıxacda

Bu tıxacda

Bir yol gedilirsə səndən qabaqda,

Demək, çatmamısan özünə hələ

Addımların boyuna boy vermirsə,

Ürəyində

Niyyətin də

Qığıldamayıb hələ.

Bu tıxacda

Hava ala bilirsənsə

Nə xoş sənə.

Niyyətindən qan damanlar

Addımını enə uzadanlar

Bu tıxacda

Qabağa gedə bilməzlər.

Sənin qabaqda gördüklərin illüziyadır, əslində.

Ha qaç çata bilməyəcəksən,

Özün durduğun yerdə

Özün də deyilsən.

Bu tıxacda

Tıxac yaratmaqdansa

Tıxac yarmaq

Ən böyük qəhrəmanlıqdır.

Günəşin gizli sifəti qaranlıqdır.

Biz aydınlıqlar adamıyıq.

Bütün aydınlıqlar tıxacları tıxayar.

Tıxaclar tıxananda

Yeni yol başlayar.

Ruhum...

Ruhum dörd yolayrıcıdı,

Hər səmtdən gələn

Kəsib keçir içimdən.

Düşünürəm,

İki bölünməkdən

Bir də iki bölünməkdən

Öyrəncəliyəm buna.

Düşüncəmdə zamanın sırsıra bağlamağına.

Yanmıram

Yanmıram ki, əriyə.

Bilirəm, köçəriyəm.

Köçür içimdən qatar-qatar

Yollar.

Gözlərimin önündə o qədər quru xatirələr var,

Heç birinə gözlərimin gücü yetmir su verə.

Ayağından su içən,

Dimdiyindən balalayan sünbül misalıdır dərd də.

Eh, nəyin dərdin çəkirəm ki?

Fikirləşirəm:

Birmi, ikimi?

Bu dörd yolayrıcında

Hansı hansı səmtə atım?

Özümü atmaq istəyirəm özümdən,

Heyif, zirvəmə dırmana bilmirəm.

Sənsizlik

Yenə də çəkirəm bu gecəni içimə

Siqaret tüstüsündən ağırdır sənsiz havalar.

İncimə

Bu aralar

Xəyalın özündən sadiqdi.

Hər gecə xəyalına söykənib uyumaq

Vərdiş halını alıb daha.

Sabaha

Sənli xəyalları qucaqlayıb sənsiz səhəri açmaq

Və var gücünlə özündən qaçmaq

Bir də vulkan kimi içindən püskürmək təhlükəsi,

Yaşamaq budurmu

Budursa

Bəs ölmək nədir?

Ölmək ikilikdən birinin olmamasıdır.

Adam təkləndikcə tükənir.

Fil çəkə bilməz heç tək insan çəkəni.

Yenə də çəkirəm bu gecəni içimə

İçimdə bir boşluq var,

Dağlar

Çaylar

Dənizlər

Kəhrizlər

Qarışıb bir-birinə.

Sənsizliyin tüstüsü boğur içimdə içimi

Dünyanın siyasi xəritəsidir içim

Özümdən keçməyə qoymur öz sərhədim.

Yoxsa...

Təzad

Ölüm adilər üçün ayrılıq,

İradələr üçün görüşdü.

Görüş Tanrının qismətidi,

Bu qismət kiminsə nəsihəti,

Kiminsə vəsiyyətidi.

Həyatda gördüklərimiz

Əslində, tanımadıqlarımızdı.

Tanıdıqlarımız hər gün bir sifətdə görünür gözə,

İçindən vulkan kimi püskürür söz:

Möcüzə.

Çölündə donursan,

İçində aldandığına yenə də aldanırsan.

Ölmək istəyirsən sadəcə

Qabaqda uçurum arayırsan atasan özünü,

İstəyirsən ölüb öldürəsən ölümü.

Dırmanırsan kəllənə,

Ordan atmaq istəyirsən özünü öz dibinə.

Birdən keçən il intihar edən şairi xatırlayırsan,

Üç gün haqqında gedən yazıları

Vərəqləyirsən xatirəndə.

Bir də görürsən beynindəki fikrin yerində

Yaşamaq şüarı baş qaldırır.

Yaşamaq

Sevgi ilə yaşamaq.

Otunu,

Suyunu,

Təbiətin hər huyunu sevib yaşamaq,

Elə ölümə qalib gəlməkdir hər gün.

Bunları uşaq vaxtı diktə edərdi bizə anam.

İndi təkrarladır zaman.

Elnur Uğur

Ədəbiyyat qəzeti.- 2021.- 11 sentyabr.- S.27.