Qazaxdakı İsmayıl Şıxlı

parkında abadlıq işləri görülüb

Qazaxdakı İsmayıl Şıxlı parkı 2007-ci ildə yaradılıb. Prezident İlham Əliyevin müvafiq Sərəncamı əsasında görülən mühüm işlərdən biri kimi həmin parkda Xalq yazıçısının heykəli qoyulub. O vaxt heykəlin açılışında ölkə rəhbəri və Mehriban xanım Əliyeva iştirak etmişdilər.

Həmin vaxtdan 15 ilə yaxın vaxt keçib. Bu günlərdə Qazax rayon rəhbərliyi parkda abadlıq və bərpa işləri görüb. Bu barədə Azərbaycan Yazıçılar Birliyinin Qazax bölməsi məlumat yayıb. Parkda yerə müasir standartlara uyğun tametlər döşənib, vətəndaşların istirahəti üçün yeni, daha rahat oturacaqlar quraşdırılıb.

Bugünlərdə parkın bərpası ilə bağlı keçirilən yığıncaqda Qazax rayon İcra Hakimiyyətinin başçısı giriş sözü söyləyib, qazaxlı deputat Səməd Seyidov, Qazaxıstanın Azərbaycandakı səfiri Serjan Abdıkarimov, AYB Qazax bölməsinin sədri şair Barat Vüsal, BDU-nun

Qazax filialının professoru Valeh Nəsibli, Azərbayan Jurnalistlər Birliyinin sədri, Xalq yazıçısının oğlu Elçin Şıxlı çıxış edərək görülən bərpa işlərinə görə ölkə rəhbərliyinə təşəkkürlərini ünvanlayıblar. Onlar İsmayıl Şıxlı haqqında fikirlərini, ürək sözlərini, xatirələrini yığıncaq iştirakçıları ilə bölüşüblər.

Qazaxıstanlı səfirə Qazax rayon İcra Hakimiyyəti adından saz hədiyyə edilib.

Elçin Şıxlının danışdığı kiçik bir xatirə hamını həm kövrəldib, həm də qürurlandırıb: "Atam,1-ci Qarabağ müharibəsi dövründə qazaxlılar öz yerlərində bərk dayansınlar deyə bu parka gəlib, indi oturmuş halda heykəli qoyulmuş bu bağda əyləşərək rahat-rahat çay içib ki, qoy adamlar görsünlər, doğma torpaqları qoyub harasa qaçmağa ehtiyac yoxdur. Qorxmağa ehtiyac yoxdur, mən burdayam, onlarla birlikdəyəm".

Tədbirdə tələbə Qənirə Musayeva və məktəbli Nərgiz Cəfərova Xalq yazıçısına həsr olunmuş şeirlər söyləyiblər.

Tədbir aşıqlardan Yaşar Gülümcanov və Samir Allahverdiyevin ifa etdikləri saz havaları ilə başa çatıb.

Ədəbiyyat qəzeti.- 2022.- 16 iyul.- S.32.