Payız

Payız kimi bəzənmisən

Gözlərində qəm görürəm.

Xəyalımda körpəliyim

Uşaqlığı, ahıllığı

cəm görürəm...

Qıpqırmızı almaların

Yanağında xal görürəm.

Damağımda ana südü,

Əncirlərin göbəyində

bal görürəm...

Payız kimi bəzənmisən

Titrəyişin - yarpaq kimi.

Dünən idi gəncliyimiz...

Göz qırpımı, su içimi.

Ömür gedir taqqataqla -

qatar kimi

Şəmkir - Bakı qatarına -

Tələbəlik illərinə

qaytar məni.

Sonra, sonra təyyarələr

Yedi mənim gül ömrümü.

Neçə nadan, neçə paxıl

Yelpiklədi kömürümü...

Bu payızın kirpikləri

sapsarıdı

Qızılını qopardılar.

Allah verən nemətləri

Allahsızlar apardılar...

Fişəng kimi uğurlarım,

Dəniz kimi qəhqəhələr.

Daha nələr, nələr, nələr...

Ləpələnib yox oldular.

Neçə dostun sədaqəti

İt ömrünə sığışmadı.

Sevgilərim nəm çəkdilər,

Vulkanlardan alışmadı...

Payız kimi bəzənmisən

Gözlərində qəm görürəm.

Xəyalımda körpəliyim

Uşaqlığı, ahıllığı

cəm görürəm...

***

Bir ağac var

bu ormanda

Ayaqları revmatizma, şəkər -

Kəsiləsi, yıxılası...

Bir şivkə var

bu ormanda

Başına işlər gələsi:

Sinəsi

bıçaqla qazılası,

Yazılası

Nələr, nələr olası...

Bir dombalan əllənir

Bu ağacın altında.

Gördüm daha...

Bir bənövşə boylanır

Kol dibindən sabaha...

Bu arının

Ömrü məni çalanacan...

Qaş qaralır -

Ömür bitdi kəpənəyim...

Min can verib babalarım

Bu qalanı alanacan

Yenə qaldı

yağılara...

11.07.2016

***

Bu qan-qada, bu xəstəlik

Otuz ildir sürür deyə,

Gözlərimdən asın məni,

Üç yüz faiz görür deyə...

Yumurtanın sarısında

Mayalanmış ağ nöqtəni,

Gözlərinin qarasında

Malalanmış dağ hiyləni...

Göyərçinin altındadır

Çil-çil ilan yumurtası.

Kürt yatıbdır...

Ürəklər də, beyinlər də.

Yer kürəsi çat atıbdı...

Əqrəb geni mayalayıb

Çörəyimi.

Virusdan da xəbis dostlar

Zədələyib ürəyimi.

Ata, ana, bacı, qardaş

Maraqların havasında.

Necə oldu birləşdilər

Qarabağın davasında ?!!

Göylərimdən qətran yağdı -

Birləşdirdi hamımızı.

Ya salim et, ya da yandır

Bu kirəlik canımızı,

İlahi!..

***

Qışın sazağında,

türmənin həyətində

Ayağım altında əzilir Zaman...

Ayağım altında

bu yerlərin ilk qarı.

Aramızda

Karantin ömrü qədər

Məsafə,..

Bir də,

Bir bəlkənin milyard çaları...

***

Göndərdiyin

kəhraba təsbehin

Giləsinə

barmağının ucuyla

Yazdığın salamını

aldım...

Uzaqlarda qalan

ətirli günlərimi

Yada saldım...

Bütün yollar,

teleqraflar,votsaplar

Bağlı,

Xəyaldan başqa...

Nəqliyyat - virus,

Zaman - atlı qarışqa...

***

Votsapımda

yerin bomboş.

Adın

Titanikin

sərnişini kimi,

Aramla

gedir aşağı...

Aşağıda okeanın

bumbuz suları...

İslanacaq xatirələr,

əriyənə qədər!..

Ağlamağa

macalın olmayacaq.

Ağlasan da

Duzlu sular qoymayacaq

Durulsun

göz yaşının dadı...

SOS!!! həyəcanını

eşidəcək kimsə yox.

Bu gözəl gəmini

O buzlara çarpan - Sən,

Ölməyə vaxt tapa bilməyən -

Mən!..

Məni bir şeytan aldadır

Məni bir şeytan aldadır,

Yerdən və göydən aldadır.

Necə də gözəl oynadır,

Ətiri çəkib aparır...

Bilirəm ki, bataqlıq var,

Bilirəm ki, ağlım duman...

Bu yay günü yer üzü qar

Sürüşürəm, Allah aman...

Mənəm Seyiz keçisinin

Dalınca gedən quzusu.

Oralarda dərələr su...

Dərələrin "qıl körpüsü"…

Havalıyam, duyğuluyam -

Ağlım yatıb, bağrım oyaq...

Bir aləmdi ilğım-ilğım -

Nəhayətsiz göylər sayaq.

Məni bir şeytan aldadır,

Yerdən və göydən aldadır.

Necə də gözəl oynadır,

Ətiri çəkib aparır...

***

Mən sənə "mələk," - demişəm,

Mələklər əfv etsin məni

Mən sənə "ürək", - demişəm,

Ürəyim deşsin sinəmi...

Şimşəklərə kəmənd atın,

Məni gözlərimdən asın.

Gözlərim aldatdı məni...

Son baharda heyvaları,

Yaz ağzında çiçəkləri

Bir qara örpəklə örtün,

Qoy ətiri gəlməsin!..

Əllərimə dağ basın,

Şeir yaza bilməsin!..

Zəncirləyin bir qayaya -

Kötük üstə baş kimi...

Töksün göylər qəzəbini

Dolu yağsın daş kimi...

Günahlarım elə böyük -

Kəpəz boyda dağ qalanmış.

Mən sənə "mələk", - demişəm,

Mən sənə "ürək", - demişəm,

Mən sənə "çörək" - demişəm,

Hamısı da yalanmış!..

Elegiya

Kafedramızın əməkdaşı, gözəl həkim, Ümnisə xanımın, Müsabəylilər nəslinin yadigarı, Novruz bayramında bizlərdən qəfil ayrılan Flora xanımın əziz xatirəsinə

"Ölüm qulun Azadlığı"

Azadlığın mübarək, Flora!

Ana... Ana qoynundakı rahatlığın,

Rahatlığın mübarək, Flora.

Ağlayan - gülən

şəklin qalıb yadımda...

Gözəliydin.

Gözəlliyi sevərdin.

Torpağında

Göz yaşından sulanan

Qızılgül olmayacaq.

Bənövşələr bitəcək -

Tapdalanmış, əzilmiş.

Boynu sınmış bənövşələr,

Qıçı sınmış, alnı sınmış bənövşələr.

Torpağında

Qızılgüllər olmayacaq,

O ağrılar, o ağılar itəcək.

Gözlərində qüssə-qəm

Üzügülər bənövşələr bitəcək...

Min təəssüf...

Öz tağında bənövşəni iyləyən

Yiyənimiz azdan-az,

"Cənnət anaların ayağı altda" -

Deyənimiz azdan-az...

Doğmaların yəhərləyib qapdılar,

Uzaqların darıdılar bir ömür.

Tale səni dönə-dönə döyərdi,..

Qəfil yağan yağışlardan

Sonra çıxan gün olardın.

Sən bir ömür

Göz yaşından təbəssümə,

Təbəssümdən göz yaşına

sürgün olardın...

O nəslin uluları

Ağırdılar,

Bəlkə səni bu bayramı

O dünyada bəzəməkçün çağırdılar?..

Əlin gözəl, təbəssümün narın-narın

Şəkərbura,

paxlavaların...

Yürüyərsən "can!", - dediyin

Gül Ananın gül qoynuna,

Sarılarsan boynuna.

Ana mehri sağaldacaq

Sındırılmış taleyini...

Sonra bizim

Ayağını yerə vursa, yer qatlayan

Mərd Anamız, Nur Dünyamız

Ümnisə xanımın

Əllərindən öpüb, salam deyərsən.

Deyərsən ki, Siz gedəli

Yüz qulunuz ağı dedi...

Bir əl boyda daşı yazıb

Evinizin divarına vurammadı

Düz elədiz incidiniz, getdiniz...

Ağlayan-gülən

şəklin qalıb yadımda...

"Ölüm qulun Azadlığı"

Azadlığın mübarək, Flora!

Ana... Ana qoynundakı rahatlığın,

Rahatlığın mübarək, Flora.

Paşa QƏLBİNUR

Ədəbiyyat qəzeti.- 2022.- 19 mart.- S.12.