Adı soyadından

bir hava var çöldə

qatarın altına düşməyin

qorxusundan əsir

külək tuneldə.

Ayağı çəkməli, əli qayçılı

bulud keçib dan yerindən,

bir əsgər cəbhə xəttini

o üzə adlayıb

Vətən şeirindən.

Parkda ağacların

polisin gözü önündə

sevişən vədəsi:

kök sevgilisinə

"mənim sala-m"

yazır votsapın səsi.

Dodaq böyüdürlər

qeybət internatında,

amma hənir yoxdu

sözün alt qatında.

Axşama bir əlimizi

təmiz saxlayaq barı,

Birdən sayası olduq -

kefli balkonlardan

uçan boşqabları...

Qulu Ağsəs

Ədəbiyyat qəzeti.- 2022.- 10 sentyabr.- S.23.