Sevməzdim səni?!

Müharibədən sonra...

Mərmilərin səsindən oğurlayıb

qulağımda polkovnikin hələ də vıyıldayan

"bu gecə bəlkə hücuma keçdilər"

sözləriylə başlayan

müharibə yuxusuzluğundan

körpə yuxusuna aparan

şirin, lay-lay sözlərin olmasaydı

sevməzdim səni.

Əsgərlərinin ölümündən qopa bilməyən

özünü bir ipdən asan qazi kimi

onun o ipə aşiq olduğu, xilas gördüyütək

qəlbim asılıb hörüklərindən.

Saçların hörük olmasaydı

İnan,

sevməzdim səni.

Ovcumdakı güllələri,

içində adım yazılmış gilizi unutduran

sərçə barmaqların olmasaydı

sevməzdim səni.

Əsəb, müharibə stresi

Və Şuşa dağlarının vurduğu dondan

zəifləyən gözlərimə işıq olan

məsum, çocukca baxışın olmasaydı

sevməzdim səni.

Hələ də gözümün önündə

qan ağlayır

əldən ayrı düşən əsgərimin barmağı.

Qəlbimin ağrısı yuyan

su kimi gülüşün olmasaydı

sevməzdim səni.

Ayaqsız döyüşçüləri görəndə

ayaqlarım büdrəyir,

utanıram özümün addım səsindən.

Yerimə addımlayan

yerişin olmasaydı

sevməzdim səni.

Burda insanlar

daha qəddardı mərmilərdən.

Top atışından,

ya da bir minomyot mərmisindən

daha öldürücü, daha gerçəkdir

İnsanların saxta könülləri.

Körpə qoxusu qədər saf və müqəddəs

ürəyin olmasaydı

sevməzdim səni.

Gizlənqaç oynayırıq burda dronlarla

gah torpaq, gah da buludlar

ən doğma xilaskarımızdı indi.

Harda olsam məni tapan

güllə dəcəlliyin olmasaydı

sevməzdim səni.

Bu göy sənin, bu yer sənin,

dəniz sənin, şəhər sənin,

istədiyin hər şey sənin.

heç nə istəmirəm -

Təkcə səni istəyirəm.

Mənə lay-lay olan şirin sözlərini,

qəlbim asılan saçlarının hörüyünü

güllələri unutduran sərçə barmaqlarını,

mənə ver,

özünsə çıx get.

Gözlərimə işıq olan baxışını,

könlümün ağrısını yuyan su kimi gülüşünü,

mənə ver,

özünsə, gedə bilsən, get.

Yerimə addımlayan yerişini,

körpə qoxusu ürəyini, ruhunu,

məni hər yerdə tapan güllə dəcəlliyini,

burda qoy,

özünsə...

Özün bilərsən...

De indi:

Mən sevməzdim səni?

Sevməzdim səni?

Sevməzdim?

Sən, mən və pianino

Boyatlamış dərdlərin var,

boyat, köhnə dərdlərin.

Adam da sadiq olar -

dərdlərinə, dərdlərinə?!

Əl atıb qoparsam

ürəyindən kədərini.

Görərsənmi -

əllərimi, əllərimi?!

Dəcəl barmaqların var,

dəcəl barmaqların.

Pianinonun dillərində

yandıracaq yalnızlığın işığını.

Söndürsəm "min illik" alovunu-

elə pianinonun dilləri üstdə

elə pianinonun qucağında,

qucağında.

Sevərsənmi -

günahımı, günahımı?!

Bir qızımız olar

gözləri qəhvəyi gülən -

elə sənin kimi.

Qoşulub ona gülə-gülə

saçlarımı yolarsanmı,

Yolarsanmı?!

Alın yazımın qalan vərəqlərini

qoydum dizinə sənin.

Kimi istəsən sil alnımdan,

yaz öz adını.

Yazarsanmı adını,

yazarsanmı?!

Sənsiz -

Oyuncağı əlindən alınmış uşaq kimiyəm.

Çağırsam ki, gəl -

sevindir bu saqqallı uşağı -

Gələrsənmi,

Gələrsənmi?!

Emin Piri

Ədbiyyat qəzeti.- 2023.- 1 aprel.- S.15.