Yamyaşıl bahar qız olmaq da olar,

Ağappaq qar qız olmaq da.

Qıpqırmızı üfüq olmaq da,

Masmavi dəniz olmaq da.

Dağ çayı kimi bulanmaq da olar,

Göz yaşı kimi durulmaq da.

Min yerdən qopduğun həyata

Yenidən vurulmaq da.

Nə qədər ki, ürəyimizi çıxarmayıblar

sinəmizdən,

Göy üzünü əlimizdən almayıblar.

Nə qədər ki, içimizdəki uşağın

Xoşbəxt bir anı yaşayır

yaddaşımızda,

Ən şaqraq gülüşlə də xoşbəxtik,

Ən müdrik hüznlə də.

Nə qədər ki, ən gözəl şəklimiz

Hələ gülümsəmir başdaşımızda.

Səhər Əhməd

Ədəbiyyat qəzeti.- 2023.- 15 aprel.- S.29.