Dənizlə sahilin görüşməsi

Seyr etmisənmi

suların sahillə öpüşməsini?

Zövq almısanmı

sahilin qumsal saçlarına

sığal çəkməsindən ləpələrin?

Bu qədər nazıya oynamaqmı olar sevdiyinin?

Necə də hiss olunur

qəlbinin döyüntüsü dənizin.

Ehtirasa bax,

qədəri yoxdur həyəcanın bir-birinin

üstündən aşan dalğalarda.

Necə qürurla dikəlir sahili görüncə.

Gah bərk qucaqlayır,

Gah incə-incə.

Hələ sən səsini dinlə bu şırıltının,

Nəğməsinə qulaq as bu sevginin.

Bu da son həmləsi dəli suların.

Özünü atmasına bax daşların üstünə,

ordan geri axmasına bax

səpələnmiş damcıların.

Bura görüş yeridir dənizlə sahilin.

Uzatdı əlini

Uzatdı əlini yuxuda mənə,

Tutdu əlimdən bir az.

Sığalladı üzümü,

Saxladı əlini üzümdə xeyli.

Nəsə pıçıldayırdı barmaqları qulağıma,

Baş barmağı da dodağıma

nəsə deyirdi sürtünərək.

Sanki danışma,

ehtiyac yoxdur sözlərə, sus,

amma bax,

bax deyirdi.

Mənim gözlərim

- gəl,

Onun gözləri

- yox deyirdi.

Əlini çəkdi geri.

Oyandım,

od tutub yanırdı əlinin yeri.

Payız süfrəsi

Süfrə açıb xəzəldən

bizimçün qızıl payız.

Hər rəngdə, hər bəzəkdə nemət var qarşımızda.

Qırmızılar şirindir, sarıları turşməzə.

Qızılı yarpaqları

göz oxşar, süfrə bəzər.

Min xatirə gizlənib qurumuş yarpaqlarda.

Bəzisi gül ətirli,

Xəbər verir bahardan.

- Bəs bu acılar nədir,

Alışdı dil-dodağım?

Ömrü acıyla keçib, söylə, hansı yarpağın?..

Sordum çılpaq budaqdan...

- Dedi - Acı yarpaqlar,

soyuq xəzan baxışından

başı bağrının sökülüb,

vaxtsız leysan yağışından

yerə zamansız tökülüb

saplağı nəm qalandır.

Onlar sarı, al deyil, rəngi yaşıl olandır.

Uzun, qısa, xoş, naxoş

Yazı var alnımızda.

Gülüm mənim

Bir zamanlar qönçə idin,

gördüm səni gülüstanda...

Seçdim səni,

min çiçəyin arasından,

yüz gözəlin sırasından

seçdim səni,

Gülüm mənim...

Aşiq oldum,

"Bir könüldən min könülə".

Uçdum eşqin havasında,

"Dəli" kimi sevdim səni,

Gülüm mənim...

Qoxladım o, gül ətrini,

Duydum sevdanın sehrini.

Söz verdik ki, biləcəyik

Anımızın,

günümüzün,

sevgimizin,

özümüzün biz qədrini...

Əzizləyib dərdim səni,

Gülüm mənim...

Əkdim səni öz bağçamda,

Özüm üçün əkdim səni.

Gülüm mənim...

Çiçək açdın, qəşəngləşdin, ətirləşdin,

Sən daha da gözəlləşdin.

Gülüm mənim...

Demə ətrin azalıbdı,

Yarpaqların qırışıbdı...

Bütün güllər yarışıbdı.

Sən,..

Bağçamın şah gülüsən!

Əvvəlkitək ətirlisən,

Vəfalı dost, sevgilisən,

Gülüm mənim...

Yenə yanındayam

Mən yenə burdayam, sənin yanında,

Hələ gülümsəyib baxa bilirəm.

Odum-alovumla bağrım başını

İçimdən yandırıb yaxa bilirəm.

Hansı ölçüdəymiş, bilirəm dəqiq,

Gördükcə üzündən yağır qəm kədər.

Sənin ürəyini sıxan ağrılar

Mənim gözlərimdən sel kimi gedər.

Nə yaxşı yaxşılar var bu həyatda.

Bəzən qolundan da tapılır tutan.

Sənsizlik həsrəti öldürər məni,

Bir axşam mən sənə çatmasam, inan.

Baxma ki, gözləri gülür Dərdlinin.

Şahid olmadı o gözlər nələrə?

Bəlkə inanarsan sözümə bir gün,

Bəlkə mən də bir gün dönüb gələrəm.

Gör, saat neçədir...

Gör, saat neçədir,

Sən yoxsan, amma...

Ləngimisən,

nədən bilmirəm yenə.

Yazıq qapım bezdi baxışlarımdan,

Telefon da darıxdı əllərimdə.

Pəncərəmin gözlərinə su gəldi,

Aralanıb durdu yazıq pərdələr.

Sükut tıqqıldadır saat səsini,

Dartır əqrəbləri qara nöqtələr.

Lənətə gəlsin, bu sakitliyi,

Gəl!..

Gəl,

Ya da yaz bir kəlmə, ki darıxıram.

Ki sənsiz mənim də gün deyil günüm.

Tapışa hardasa arzularımız,

Barışa hardasa bu əllər yenə.

Baxışlar görüşüb ürəkdə dinə.

Eşqin alovunda görünə bir iz.

Gör saat neçədir,

Bu qaranlıqdan,

Qorxuram ki, qorxar məhəbbətimiz.

Bir mələksən eləcə

Bir mələksən eləcə,

Gəlmisən nağıllardan.

Səndə insaf yoxdursa

Bəs məndə ağıl harda.

Gözlərin əfsanədir,

nağıldır dodağın da.

Sözlərin hərf-hərf

dağıldı qulağımda.

Gülüşdülər üzümdə,

Alışdılar gözümdə.

Ən şirin kəlmələrlə

Danışdılar sözümdə.

Birisi yuva qurdu

Ürəyimin içində.

Yeni nağıl başladı

O gün mənim üçün də.

Sezon finalı

Nə filmdir bu belə?

Bilet yox, kassa yox,

Qapılar açıq.

Seyrçisi milyard oldu,

İlk günün

Ekspromt çəkilişində.

Nə yazıq ki,

"Bu filimde hiç bir canlıya zarar

verilmemişdir" sözləri yazılmamışdı

saat 4-16 da...

Və...

Bu da başlanğıc...

Divarlar alqışladı ilk səhnəni.

Bütün qəhrəmanlar töküldü meydana...

Bir-birinə "İyi gecələr" diləyənlər

Dəydi bir-birinə,

Uçurkən göyün

3-cü, 5-ci, 7-ci qatlarında.

Yer göyə qarışdı,

Göy yerə düşdü...

Bir anda dar məzara döndü

geniş yuvalar.

2 ayaq bəs etmirdi qaçmağa bu dəhşətdən.

Heyvanlar daha şanslı idi insanlardan...

Beton dişli əjdahaya dönmüşdü evlər.

Kimi harda tutdu orda alırdı soyuq,

dəmir dişlərinin arasına...

Bax görüm kənardan, necə baxırsan.

Duy görüm bu acını, hiss et !..

Budur dünyanın faniliyi,

Budur həyatın gerçəkliyi...

Qarışqa boyda yaxınlığa möhtac qalar

bəzən fil boyda adam.

Bir cınqıltı,

bir hənirti,

bir tappıltı

təsəlli olar

daha bir neçə saat gözləməyə

gecə-gündüzü bilinməyən

qaranlıq yuvada.

O yuva ki,

divarı üstdən basır,

Tavanı qaçır ayaq altından.

Daş yastıqlar çox görmüşdü bu millət

cəng meydanlarında.

Daşa yastıq olan başlar gördü indi də.

Görəsən soyuq daşlar rahatdırmı

İsti bədənlərin üstündə...

Amandır, incitməyin o daşı.

Tərpətməyin betonu.

Ehtiyatla davranın, dəyişməsin yerini.

Başqa yataqların

gücü yox saxlasın onu...

Havası toz dumanda,

İşığı göz yumanda,

İstisi buz damanda

Qaldığı yerdən tərpənməz adam.

Əlini uzadanın kimliyinə varmaz.

Barışar beləcə bir çoxları taleyi ilə

ümidi kəsilincə səssizcə.

Köməyə kimsə gəlsin deyə

İnildər, zarıyar adam...

Daş kimi ürəklər əriyər

bu filmdən,

Acı suyu axar

donmuş gözlərdən.

Nə yazıq ki, film deyil,

gerçək ssenarisidir

Yaradanın.

İlk səhnədə

yaratdığı on minlərlə qəhrəmanın finalı...

2023-ün 6 şubat sezon finalı.

Qabil DƏRDLİ

Ədəbiyyat qəzeti.- 2023.-21 aprel.- S.29.