İndi mən sənə ibadət edirəm

Sadəcə, paltar olduğunu bilirdim.

Amma unutmuşdum.

Yalnız sən onu çıxarmaq istəyəndə

bunu təlaşla xatırladım

və həmin andaca öz-özümdən soruşdum:

"Hətta on illərdi düşünsələr belə ki, o sənsən,

yalnız paltardı axı...

Və bu təlaş nə üçündü?"

İndi heç bir anlaşılmazlıq yoxdu.

Budur, o, əzik-üzük vəziyyətdə,

köhnəlmiş, ömrünü başa vurmuş,

səninlə də heç bir əlaqəsi olmamış kimi

güllərin altındadı yad bir şey kimi.

Baxışlarımı yayındırdım.

Sən isə, hiss eləyirdim ki, baxırsan

mənə və hər ikimizə birlikdə,

amma necəsə çox uzaqdan.

Görünmürdün,

Uellsin romanında necəydisə, elə:

yalnız paltar səni görünən edə bilərdi.

Bir də qar,

çiyninə, kürəyinə düşüb qalan qar -

o da sənin varlığını faş eləyə bilərdi.

Amma kilsədə qar yağmır.

***

İndi mən sənə ibadət edirəm,

bilirəm, aralıq bir dayanacaqsan -

varsan, bilirəm.

Sən elə bir sığınacaqsan ki,

orda sözlərim başqa əlifbayla köçürülür.

Sənə ibadət edirəm:

səndən sənin özündən başqa

nə istəyim ki...

Sən isə heç nə anlamadan

sözlərimin üzünü köçürüb

daha uzağa göndərirsən onları.

Hər şey

Yarpaqlar, sözlər, göz yaşları,

kibrit qutuları, pişiklər,

bəzən tramvaylar, un növbələri,

uzunburun cücülər, boş şüşələr, nitqlər,

televizorda uzunboylu göstərilən şəxslər1,

Kolorado böcəkləri, benzin,

bayraqlar, tanış simalar,

Avropa Çempionlar Kuboku2,

qazla işləyən maşınlar,

ixrac üçün yararsız almalar,

qəzetlər, baton çörəklər,

saxta yağlar, qərənfillər,

aeroportdaca təbriklər,

"Cico"3, şokolad batonlar,

Buxarest salyamisi, pəhriz qatıqları,

"Kent" satan qaraçı qadınlar,

Krevediya4 yumurtaları,

şayiələr, şənbə axşamı,

yalançı kofe,

xalqların sülh mübarizəsi, xorlar,

hektar üzrə məhsuldarlıq,

Herovital5, yubileylər,

bolqar kompotu, fəhlə yığıncağı,

yüksək növ regional şərab, Adidas6, lətifələr,

"Kalya Viktoriya"dakı7 yeniyetmələr,

okean balığı, rumın nəğmələri8,

hər şey.

Uzun "A"

Cərrah bıçağı toxunmuş adam

ağrını vəsf etməyib,

kürəyinə bıçaq saplanmış adam

qorxusunu və ölümünü şeirə çevirməyib,

eləcə

xırıltılı və batıq "A" ilə keçinirsə ki,

dünya inciləri

onun yanında cırıltıya bənzəyir,

mən də hər şeydən daha çox

üstünlüyü həmin uzun,

arasıkəsilməz,

"A"ya verirəm.

Çünki bilmirəm

hansı qafiyələnmiş misra

ağrının sirrini

onun qədər faş edib -

həmin asi sait qədər.

Rus və ingilis dilindən tərcümələr

Səlim Babullaoğlunundur

Ziyarət

Başqa dünyaya

protokol ziyarətinə gəlirmiş kimi,

kədərlə qəbiristanlığa gələn qocalar

evə qayıtmalı olduqlarını,

həmişəlik

qala bilmədiklərini

düşünməkdən yorulublar.

Zəbur

Ayılar qış yuxusunu səndən öyrəndi,

amma mənə yuxunun

nə olduğunu öyrətmirsən?

Səndən çox şey istəmirəm.

Bilirsən,

ölüm üçün

çox təvazökaram.

Amma açıq gözlərimin qarşısında

hərəkət edən kimsə

səndən xahiş etmişdimi

mövcud olmayan küləyi?

At gözü kimiyəm

Sipərlə dünyaya qapadılmış

at gözü kimiyəm.

Məndən soruşma

yanına gələrkən

hansı ağacları,

hansı gülləri

görmüşəm.

Mən ancaq yolu görürəm,

bəzən də

mənə nəsə anlatmağa çalışan

buludların kölgəsini.

Siz nəsə bilirsiz

Siz nəsə bilirsiz, amma demirsiz mənə.

Siz mütləq nəsə bilirsiz,

başqa cür necə yaşamaq olar

bu qədər ömrü,

ana, ata

və siz - dünyanın bütün qocaları?

Bağışlayın, sizi kücənin ortasında saxlayıram,

səksən yaşlı cənab,

mənə aça bilərsinizmi

o sirri?

Toz-duman lava üzərində

qarşınızda diz çökurəm, qocalar,

o sirri mənimlə paylaşın...

Soyuq ulduzlar tək əllə sizi tumarlayırlar

və siz ölmürsünüz.

Rumın dilindən tərcümələr

Jalə İsmayılındır

1 - Rumın televiziyasının alçaqboylu Çauşeskunu uzun gostərməsinə işarə

2 - Buxarestin "Styaua" komandasının qələbəsinə işarə

3 - Sərinləşdirici içki

4 - Munteniyada yaşayış məntəqəsi

5 - Rumın istehsalı olan dərman

6 - Qida qıtlığı, ət novbəsi zamanı əhaliyə təklif olunan donuz ayaqlarına işarə

7 - Rumıniyanı, daha çox Çauşeskunu vəsf edən mahnı-şeir musabiqəsi

8 - Buxarestdə Qələbə prospekti; vaxtilə Rumıniya xüsusi xidmət orqanı olan

Securitate "hamı izlənir, nəzarətdədir" duyğusu yaratmaq və əhalinin canına qorxu salmaq üçün uşaq evlərindən götürülmüş, xüsusi olaraq təlim görmüş yeniyetmələri hərəkətsiz

dayanmaqla bu prospekt boyunca düzürdü.

Ana Blandiana

Ədəbiyyat qəzeti. – 2023. – 2 dekabr, № 46. – S. 18.