Sevirəm səni

Mən niyə demədim sevirəm səni?

Bəzən boylanıram ömrün yazına,

O kövrək hisslərdən ürək qızına...

Hər şeydən danışdıq biz dostcasına,

Mən niyə demədim sevirəm səni?

Sevirdim, hamıdan bunu gizlədim,

Xəyalda bir xoşbəxt həyat bəslədim.

Mən niyə susmuşdum, kimi gözlədim?

Mən niyə demədim sevirəm səni?

Yad hisslər qəlbimə yabançı oldu,

Bilirəm, ortada miyançı oldu.

"Sevirəm" söyləyən yalançı oldu,

Mən niyə demədim sevirəm səni?

Tərləyib abırdan, utanıb üzdən,

Çəkinib üzümə dikilən gözdən,

Sən həya eylədin bəlkə bu sözdən,

Mən niyə demədim sevirəm səni?

İl-ilə calandı, gün-günə döndü,

Dünyanın yarısı bir dinə döndü.

İçimdə hayqıran dərdimə döndü,

Mən niyə demədim sevirəm səni?

Bu sözlər içdiyim andım olardı,

Dönük taleyimə yardım olardı,

Seçdiyim ən düzgün addım olardı,

Mən niyə demədim sevirəm səni?

Nüsrət MUSAYEV

Ədəbiyyat qəzeti. - 2023. - 30 dekabr. № 52. - S. 17.