Bəyburd təkurunun qızının Beyrəyə dedikləri

“Dədə Qorqud” dastanına düşməyən şeirlər silsiləsindən

Baybörə bəyin yeddi qızdan sonra gələn

madar oğlu

Bamsım Bamsım deyib əzizlədiyi

Dədən Qorqudun Beyrək adını verdiyi

üzü niqablı Bamsı Beyrək...

Boz ayğırlı

dəstəyi ağ tozlu yaylı

altı pərli gürzlü

igidlər igidi

ərlər əri

Bamsı Beyrək...

Baybican bəyin madar qızı

Banıçiçəyə adaxlanmadınmı igid

oxunun düşdüyü yerdə

bəylik çadırın qurulmadımı igid

adaxlının tikdiyi qırmızı qaftanı

geyinmədinmi igid

qırx ərən yoldaşınla

işrətə qurşanmadınmı igid

xain sizi casuslamadımı igid

kafir dediyiniz təkur

yəni atam

ordusuyla başınızın üstünü aldı

qırx ərənindən birini naibini öldürdü

yatdığınız yerdə otuz doqquz igidinlə

səni əsir götürdü

toy alaçığı yas alaçığına dönən Bamsı Beyrək

adaxlısının muradı gözündə qalan Bamsı Beyrək

atası Baybörənin ağlamaqdan

gözləri tutulan Bamsı Beyrək

anası al yanağını yırtan Bamsı Beyrək

yeddi bacısı qara geyib

göy bağlayan Bamsı Beyrək

otuz doqquz igidinlə on altı il

Bəyburd qalasında əsir qalmadınmı igid

nisgilini qopuzun tellərinə tökmədinmi igid

zulum-zulum ağlamadınmı igid

muradına çatmadığın nişanlınçün

burnunun ucu göynəmədimi igid

dəstəyi ağ tozlu yayın

altı pərli gürzün

əlindən alınmadımı igid

boz ayğırın təkurun ilxısına qatılmadımı igid.

at kişnəyər igid öyünər

atsız igidin ümidi olmaz

ümidsiz qalan Bamsı Beyrək

uca dağlar yaylağın idi

yaylaqsız qalan Bamsı Beyrək

soyuq-soyuq sular içdiyin idi

susuz qalan Bamsı Beyrək

tövlə-tövlə atlar mindiyin idi

yaya qalan Bamsı Beyrək

qatar-qatar dəvələr yüklüyün idi

yüksüz qalan Bamsı Beyrək

sürü-sürü qoyunlar şişliyin idi

şölənsiz qalan Bamsı Beyrək.

on altı il atamın əsiri oldun

Oğuz bəyləri öz kefində

Öldü-qaldın bilinmədi

Oğuz bəyləri öz kefində

Qaranlıq gecədə yolun aydınlanmadı

Oğuz bəyləri öz kefində

Bəyburd qalasını aşa bilmədin

Oğuz bəyləri öz kefində.

Banıçiçəyin qardaşı Dəli Qarcar

Bayındır xana varmadımı igid

Varıb da qabağında diz çökmədimi igid

Beyrəyin qaldısını gətirənə xələt

Öldüsünü gətirənə bacımı verərəm

demədimi igid

Dostun Yalançı oğlu Yalancıq

ona verdiyin köynəyi qana batırıb

Beyrək öldü xəbərini gətirmədimi igid

Dəli Qarcar sözünü tutdu

Banıçiçəyi Yalançı oğlu Yalancığa verdi

sıra-sıra toy alaçıqları quruldu

Oğuz bəyləri işrətə cəm oldu

xəbər sənə də çatdı

qopuz çalıb dərdini dilləndirmədinmi igid

halətin bağrımı yaralamadımı igid

örkən salladıb səni qaladan buraxmadımmı igid

gəl halallıqla məni al demədimmi igid

and vermədinmi igid

bəs andın nə oldu igid

toy alaçığına yetişən Bamsı Beyrək

toy xörəyindən yeyən

toy şərabından içən

özünü nişan verən

Banıçiçəyi görən

əhdi yadından çıxan Bamsı Beyrək

andını unutdun, igid

dalımca gəlmədin, igid

halallıqla almadın, igid

qılıncınla doğran, igid

oxuna sancıl, igid

yer kimi çatla, igid

torpaq kimi sovrul, igid

xəyanətə qurban get, igid

qarğışım alqışın olsun, igid...

Həmid PİRİYEV

Ədəbiyyat qəzeti.- 2023.- 10 iyun. S. 13.