Kopenahgen pişikləri

Ceyms Coysun nəvəsinə yazdığı hekayəsi

Ceyms Coys nəvəsi Stivenə göndərdiyi 5 sentyabr 1936-cı il tarixli məktubunda "Kopenhagen pişikləri" hekayəsini yazır. Coys həmin vaxt Kopenhagendə idi, nəvəsi isə Fransada yaşayırdı. "Kopenhagen pişikləri"nin mövzusu Coysun həmin il başqa məktubla nəvəsinə göndərdiyi "Pişik və şeytan" nağılı ilə əlaqəlidir. "Pişik və şeytan" nağılını da "Ədəbiyyat qəzeti"nin oxucularına təqdim etmişdik. İndi isə ilk dəfə 2012-ci ildə ayrıca kitabça kimi çap edilən "Kopenhagen pişikləri"ni təqdim edirik.

Kopenhagen pişikləri

Heyif ki, sənə Kopenhagen pişiyi göndərə bilmirəm. Çünki Kopenhagendə pişik yoxdur. Orda çoxlu-çoxlu balıq və velosiped var, amma pişik yoxdur.

Burda heç polis də yoxdur. Bütün polislər gününü evdə, çarpayıda keçirdir. Onlar səhərdən axşama qədər böyük Danimarka siqarları çəkib ayran içirlər.

Qırmızı geyimli çoxlu-çoxlu oğlanlar bütün günü velosipedlə teleqram, məktub və açıqca daşıyır. Bunlar yolu keçmək istəyən qarıların və çoxlu şirniyyat üçün evə yazan uşaqların, bir də Ay haqqında nəsə öyrənmək istəyən qızların polislərə yazdığı məktublardır.

Polislər o məktubları elə çarpayıda, siqar çəkib ayran içə-içə oxuyurlar. Sonra qırmızı geyimli oğlanlara müvafiq əmrlər verirlər və oğlanlar da qayıdıb məktub yazanlara nə etmək lazım olduğunu çatdırır.

Mən növbəti dəfə Kopenhagenə gedəndə özümlə pişik aparacağam və danimarkalılara pişiyin kiminsə köməyi olmadan yolu necə keçdiyini göstərəcəyəm. Və yerli sakinlərə bunu göstərmək pişik üçün heç də baha başa gəlməyəcək (özün fikirləş!).

Bütün günü yataqda uzanıb siqar çəkən pişik təsəvvür edə bilərsən? Ayrana qalanda isə, heç bir pişik ona dilini də vurmayacaq. Çünki onlar üçün çoxlu balıq var!

Bəs sən bu barədə nə fikirləşirsən?

Tərcümə: Həmid PİRİYEV

Ədəbiyyat qəzeti.- 2023.- 17 iyun.- S.30.