Otuz altı ildən sonra
Əzizlərim
Nüşabə və Elçinə!
Əzizlərim!
Bu əziz,
mübarək gününüzdə
Sizi xoş arzularla təbrik edəcək hamı.
Ömrün
şirin yolları açılır önünüzdə...
Qəbul
edin mənim də bu gün xeyir-duamı:
Üfüqləri
işıqdır həyat adlanan yolun!
Siz şəfəqdən süzülmüş həyat
badəsi için.
Biriniz ay
olanda, biriniz günəş olun!
Oddan-sudan
həmişə əl-ələ tutub keçin!
Həyat
sərt anlarında sınayır insanları...
Məhəbbətdə,
həyatda, sədaqətdə düz olun!
Əsib
gedən küləkdir həyatın sərt anları,
Siz boranlı
gündə də günəşli gündüz olun!
3 noyabr
1972
Mənə
elə gəlir ki, 1972-ci ildən, o gözəl noyabr
günündən keçən 36 ilin sürətli, bu
sürətin müqabilindəki heyrətin dərəcəsindən
də artıqdır.
Belə
bir rəvayət var və bu rəvayəti, deyəsən, mən
əvvəllər də hansı yazıdasa
xatırlatmışam: "Şeyx Allah adamıydı və
Allah onu bu dünyada min il yaşatdı və
nəhayət, bir gün Şeyx bağçada qızıl
güllərə qulluq edərkən cənab Əzrail nazil
olub: "Ya Şeyx", - dedi, - "vaxt tamamdır".
Qızılgüllərin beş
addımlığında qolu-budaqlı bir söyüd
ağacı var idi və Şeyx cənab Əzraildən
xahiş etdi ki, icazə versin, o söyüdün kölgəsinə
keçin, canını orada tapşırsın və Şeyx
icazəni alıb söyüdün kölgəsinə
addımladı. Cənab Ərzail Şeyxin canını
almazdan əvvəl soruşdu: "Ya Şeyx, bu min il sənin üçün bu dünyada necə
keçdi?" Şeyx barmağı ilə
qızılgüllüyü göstərib dedi: "Bax,
oradan bura gəldiyim kimi".
Rəhmətlik İlyas Əfəndiyev də tez-tez təkrar
edirdi ki, hər şey vaxta baxsa da, vaxt heç nəyə
baxmır.
1972-ci il
noyabrın 3-ü mənim ailə həyatı qurduğum
gün idi və Səadət Sarayındakı o toyda XX əsr Azərbaycan ədəbiyyatının,
mədəniyyətinin, ictimai fikrinin cismən elə XX əsrdə
də qalmış, amma ruhən bu gün də mənim (və
güman edirəm ki, yalnız mənim yox!) fikrimdə, təəssüratımda
yaşayan Əli Vəliyev, Süleyman Rüstəm,
Süleyman Rəhimov, Mirzə İbrahimov, Rəsul Rza, Nigar Rəfibəyli,
Məmməd Rahim, Mir Cəlal, Mirmehdi Seyidzadə, Məmməd
Arif, Məmməd Cəfər, İmran Qasımov, Nəsir
İmanquliyev, Cəlal Qaryağdı, akademik Əli Quliyev,
Fikrət Əmirov, Soltan Hacıbəyov (rəhmətlik
İsmayılla birlikdə), Tofiq Quliyev, Əmir Həbibzadə
(yaşı 100-ə yaxınlaşan Əmir müəllim bu
gün də BDU-nun professorudur),
Adil İsgəndərov, Tofiq Kazımov, Abbas Zamanov, Məmmədağa
Şirəliyev, Mirzəağa Quluzadə, Əkbər
Ağayev, Əziz Mirəhmədov, Mustafa Mərdanov,
İsmayıl Dağıstanlı, Möhsün Sənani,
Hökümə Qurbanova, Əli Zeynalov, Mehdi Məmmədov,
Barat Şəkinskaya, Leyla Bədirbəyli, Zeynal Xəlil,
Böyükağa Mirzəzadə, Nüsrət Fətullayev...
və bir çoxu o zaman mənə dinozavrlar
dövrünün insanları qədər qədim
görünən başqa qələm sahibləri, mədəniyyət xadimləri, o vaxt orta nəslin nümayəndələri
hesab olunan Bəxtiyar Vahabzadə, Əliağa
Kürçaylı, İsa Hüseynov, İslam Səfərli,
Kamal Talıbzadə, Məsud Əlioğlu, Hüseyn Abbaszadə,
Qabil, Salam Qədirzadə, Qasım Qasımzadə, Bəkir Nəbiyev,
Gülxur Əlibəyova, Toğrul Nərimanbəyov, Xəyyam
Mirzəzadə... və gənc Yaşar Qarayev, Yusif Səmədoğlu,
İsi Məlikzadə, Həsənağa Turabov, Əkrəm
Əylisli, Anar, Zöhrab Adıgözəlzadə, Fikrət
Qoca, Emin Sabitoğlu, Fikrət Sadıq, Araz Dadaşzadə,
Şamil Salmanov, Çingiz Əlioğlu, Rəhman Bədəlov,
Akif Hüseynov, Arif Abdullazadə, Aydın Məmmədov...
unudulmaz dostlarım Samur Novruzov, Araz Seyidzadə, daha kimlər...
Tamada Ağasadıq Gəraybəyli idi,
müğənni də Gülağa Məmmədov.
Və o tayda Əhməd Cəmil də, hamı kimi,
öz xanımı ilə iştirak edirdi.
Əhməd Cəmillə biz qonşu idik. Çox mədəniyyətli,
son dərəcə təmkinli bir adam olan
Əhməd müəllim oğlu, qızı və həyat
yoldaşından ibarət son dərəcə də
abırlı və təmiz bir ailə başçısı
idi.
İş
belə gətirdi ki, sonralar - üç ildən sonra, 1975-ci
ildən etibarən bir müddət biz bir yerdə işlədik,
mən Yazıçılar İttifaqının tənqid və
ədəbi orqanlar üzrə katibi, Əhməd müəllim
isə "Ulduz" jurnalının redaktoru idi və birgə
işlədiyimiz o qısa müddətdə də Əhməd
müəllim daxili mədəniyyəti və təmkini ilə
bir çox o zamankı ədəbiyyat generallarından, eləcə
də ədəbiyyat generalı olmaq istəyənlərdən
çox seçilirdi. Mən bir dəfə görmədim ki,
o, kiminsə arxasınca danışsın, kimdənsə
şikayət etsin, yaxud özü üçün nəsə
istəsin, nəsə tələb etsin və Əhməd
müəllim uzun illər boyu Yazıçılar
İttifaqının divarlarına höpmuş
böyüklü-xırdalı intriqalar aləminə də
tamam yad bir adam idi.
O,
Süleyman Rüstəm kimi nikbin, canlı, yüksək yumor
hissinə malik, yeri düşəndə yeyib-içən,
yaxud Mirzə İbrahimov kimi nəsihət verməyi, XVIII əsr
fransız maarifçilərinin fikirlərindən nümunələr
gətirməyi xoşlayan, hansı səviyyəli auditoriya
olursa-olsun, lazım gələndə ayağa qalxıb,
ağıllı və alovlu nitq söyləməyi bacaran,
yaxud da Əli Vəliyev kimi nəyəsə ehtiyacı olan
kimsəsiz birinin qabağına düşüb, ona kömək
etmək üçün cürbəcür qapıları
döyən, uşaq kimi küsəyən olan və uşaq
kimi də tez barışan adam deyildi və o dövrkü ədəbi
mühitin özünəməxsusluğu bir də onda idi ki,
yazı-pozuda olduğu kimi, insani baxımdan da müxtəliflik
mövcud idi.
Ürəyindən əziyyət çəkən
Əhməd müəllim bir azdan təqaüdə
çıxdı və 1977-ci ilin bir payız günü rəhmətə
getdi.
Orası
da mənim yaxşı yadımdadır ki, İmran Qasımov
adəti üzrə gecə saat bir radələrində mənə
telefonla zəng etdi və söhbət əsnasında:
- Əhmədin
ölümü mənə çox təsir edib, neçə
gündü yata bilmirəm... - dedi.
İmran ilə Əhməd Cəmilin arasında elə
xüsusi bir yaxınlıq yox idi. Sadəcə, İmran Qasımov
çox hissiyyatlı adam idi və Əhməd
Cəmil də o insanlardan idi ki, sağlığında
çox zaman yada düşmür, amma vəfatından sonra
tez-tez yaddaşa qonur və bu itkinin doğurduğu təəssüf
hissi rahatlıq vermir...
Mən bu
kiçik yazını yazarkən Əhməd Cəmilin
vaxtı ilə mənə bağışladığı
şeirlər kitabını təzədən vərəqlədim
və bir daha mənə məlum oldu ki, bu təmkinli (bəlkə
də, bir az qapalı...) insanın daxilində təbii bir zərifliyin,
bədii-estetik incəliyin varlığı şübhəsizdir,
eləcə də şəxsiyyətində olduğu kimi,
onun şeirləri də iddiasızdır, hərgah belə
demək mümkünsə, bu şeirlərdə poetik
iddiasızlıq var.
Əhməd Cəmildə mürəkkəb poetik
obrazlar yoxdur, bütün misralar sadədir, amma bu sadəlikdə
cəzbedici bir təmizlik, saflıq var, süni ifadələrə,
qafiyə xətrinə sözlərin
ardıcıllığını pozmaq, yaxud heca xətrinə
sözləri təhrif etmək kimi faktlara rast gəlmək
mümkün deyil.
Mən ədəbiyyatda
və ümumiyyətlə, sənətdə müqayisələrə
həmişə şübhə ilə yanaşıram,
çünki hər bir sənətkarın qiyməti onun
xalqının tarixi və taleyi kontekstində verilməlidir,
amma buna baxmayaraq, indiki halda ağlıma bir paralel gəlir: məndə
belə bir təəssürat var ki, Afanasii Fet XIX əsr rus poeziyasında hansı
yeri və mövqeyi tutursa, bu gün yaddan
çıxmış Ancela Devis, yaxud Patris Lumumba haqqında
günün siyasi konyukturasından gələn şeirlər
də yazmış Əhməd Cəmil "Can nənə,
bir nağıl de"nin və onlarla bu tipli, eləcə də
təbiətlə bağlı şeirlərin müəllifi
kimi XX əsr Azərbaycan poeziyasında təxminən buna bənzər
bir yer və mövqe tutur.
Mən
yenə 36 il bundan əvvəlki o gözəl 3 noyabr
gününə qayıdıram və o zaman mənim
üçün də, Nüşabə xanım
üçün də ən gözəl hədiyyələrdən
biri Əhməd Cəmilin bizim toy günümüzə
yazdığı və indiyə qədər heç bir yerdə
çap edilməyən şeiri oldu.
Və bu 36 ilin yuxarıda yazdığım həmin heyrətamiz
sürəti o şeiri Nüşabə xanımla birgə ilk
dəfə oxuduğumuz o anların unudulmaz hissiyyatını
heç vəchlə köhnəltməyib.
13 iyun
2008
ELÇİN
Əhməd CƏMİL
Ədəbiyyat qəzeti: xüsusi
buraxılış.- 2023.- 20 may.- S.22.