Heç də uzaq deyil

göy üzü yerdən

Tanrı insanları sınağa çəkir,

Hər kəs öz rənginə boyansın deyə.

Şeytan da yaxasın qırağa çəkir,

Adəm meydanda tək dayansın deyə.

Bu dünya üzümə ağ oldu hər gün,

Yenə könlüm-gözüm duruldu hər gün.

Mənim ömrüm-günüm yağ oldu hər gün,

Bu eşqin çırağı gur yansın deyə.

Heç də uzaq deyil göy üzü yerdən,

Agah oldunmu heç sirr ilə sirdən?

Dağlar dərələrə daş atır hərdən,

Təpələr yuxudan oyansın deyə.

Turan

Əbədi səadət Turandan keçir,

Əzəli arzumuz Turandır bizim.

Turana gedən yol tufandan keçir,

Yenə gözlərimiz al qandır bizim,

Əzəli arzumuz Turandır bizim.

And olsun, Günəşə, and olsun, Aya,

Ərənlər and içib Alp Ər Tonqaya,

Çəkilsin kənara hər dağ, hər qaya,

Halımız hər kəsə əyandır bizim,

Əzəli arzumuz Turandır bizim.

Türkün hər dərdinə dərmandı Turan,

Elimin ilk andı, son andı - Turan,

Görəcəklər necə tufandı Turan!

Turansız halımız yamandır bizim,

Dərdimiz-sərimiz Turandır bizim.

Türkün qart düşmənə zərbələrindən,

Qoy bir də oynasın bu Yer yerindən.

Qurtulsun məzlumlar qəm-kədərindən,

Turansız yolumuz dumandır bizim,

Əzəli arzumuz Turandır bizim.

Ruhumuz şad olmaz "Quran" olmasa,

Yurd olmaz yurd eşqi hər an olmasa,

Dünya abad olmaz Turan olmasa,

Turansız dünyamız virandır bizim,

Əzəli arzumuz Turandır bizim,

Yurdumuz-yuvamız Turandır bizim.

Dağlar duman olsa da...

İtib-batma təpələrin içində,

Gəl dağ olaq, dağlar duman olsa da.

Qaldır yelkənləri, çıxaq dəryaya,

Bu dəryada hər gün tufan olsa da.

Bir an kimi keçər min il eşq ilə,

Bu fanidə qeybə çəkil eşq ilə.

Bağrıbadaş olsun könül eşq ilə,

Aşiq könlü hərdən viran olsa da.

Bir gün mən də yurd olam bu Yurd ilə.

Sözüm qala qiyamətə qurd ilə.

Hərdən sən də oturub-dur dərd ilə,

Arsız dünya dərdə gülən olsa da.

Eşq içində eşqi duyar sözlərim,

Nadan görsə, gözün döyər sözlərim.

Bir gün gələr, dərdə dəyər sözlərim,

Mənim sözüm indi "saman" olsa da.

Daşdan keçsə, oxdan iti sözümüz,

Bəlkə də ürəkdən gülər üzümüz.

Şeirlə yazılıb alın yazımız -

Sən də inan, bu söz yalan olsa da.

Hüseyn BAĞIROĞLU

Ədəbiyyat qəzeti.- 2023.-14 oktyabr, №39.- S.27.