Dağıstan Respublikasının Yazıçılar İttifaqının

sədri xanım M.A.Əhmədova-Kolyubakinaya

Hörmətli xanım Sədr,

Məni zəmanəmizin görkəmli şairi Rəsul Həmzətovun anadan olmasının 100 illiyi təntənələrinə dəvət etdiyiniz üçün Sizə dərin minnətdarlığımı bildirirəm.

Dağıstan rəhbərliyinin, ictimaiyyətin nümayəndələrinin, qonaqların, Rəsul Həmzətoğlunun iştirakı ilə keçirilən dahi dağıstanlı İmam Şamilin anadan olmasının 200 illiyinə həsr olunmuş yubiley təntənəsində Azərbaycan Prezidenti, mənim xalqımın Ümummilli Lideri Heydər Əliyevin adından çıxışımda demişdim: "İmam Şamil milliyətcə yalnız avar deyil, kumıkdır, ləzgidir, dargindir, noqaydır, tabasaranlıdır... Zəmanəmizin böyük şairi Rəsul Həmzətovun dediyi kimi, bütün Dağıstan xalqlarının böyük oğludur, Cənubi Qafqazda isə Azərbaycan xalqının böyük oğludur!"

Bu gün böyük qətiyyətlə bildirirəm: "Rəsul Həmzətov bütün Dağıstan xalqlarının əvəzsiz övladıdır. Cənubi Qafqazda isə Azərbaycan xalqının doğma oğludur!"

Ümummilli Liderimiz Heydər Əliyevin Rəsul Həmzətovun şəxsiyyətinin və yaradıcılığının yüksək dəyərləndirdiyinin şahidi olmuşam. Prezidentin fərdi dəvəti ilə onun son dəfə Bakıya, böyük şairimiz Səməd Vurğunun yubiley təntənələrinə gəlişini, rəsmi görüşdə və dövlət başçımızın ona verdiyi şam süfrəsi ətrafında olan dərin mənalı, səmimi söhbətləri bu gün də xoş təəssüratla xatırlayıram.

Hörmətli xanım Sədr, Mahaçqalaya çox üzrlü səbəbdən - Bakıda olmadığımdan indi gələ bilmədiyim üçün hədsiz təəssüflənirəm. Deməliyəm ki, bütün Dağıstan, ordakı insanlar, dostlarım üçün çox darıxmışam, qəlbimdə güclü nostalgiya yaranıbdır.

İnşallah, yaxın vaxtlarda Dağıstana gələcək, Rəsul Həmzətoğlunun, Patimat xanımın, Dağlar diyarına uzun illər rəhbərlik etmiş Məhəmmədəli Məhəmmədovun məzarlarını ziyarət edərək əziz dostlarımla görüşəcəyəm.

HİDAYƏT

Ədəbiyyat qəzeti.- 2023.- 21 oktyabr, №40.- S.3.