Cavidlərin pak ruhu

Azər Turanın 60 illiyinə həsr etdiyi şeiri

Azər, Turan bacımızdan yadigarsan,

ruhunda pak

ruhu yaşar Cavidlərin.

De, kim verdi duasını, sadə insan,

ömür boyu yazdığın bu şah əsərin?!

Ruhunda pak

ruhu yaşar Cavidlərin.

Ana yurdun

soyumasın od-ocağı,

pəncərəni

açın səhər küləyinə.

Əli bəyi

yetişdirən Kür qırağı

ilham verdi

sənin də od ürəyinə.

Pəncərəni

açın səhər küləyinə.

Alim atan

əzəl gündən dostdu bizə,

Səməd Vurğun,

Rəsul Rza olub sizdə.

İlk qiyməti

o, verərdi şerimizə,

əlyazması

durur hələ evimizdə.

Səməd Vurğun,

Rəsul Rza olub sizdə.

Burda yenə

Ulutürkü xatırladım,

od içində,

nəfəs alan əvəzsiz ər!

Ömür boyu,

mən onu heç unutmadım,

unudulmur,

sonra bildim, And içənlər!

Mən heyranam,

gözəlliyin mənasına,

"Ədəbiyyat

qəzeti"nin aynasına

baxa-baxa,

ayrılıram səndən hələ,

İmamverdi

muzeyində yeni görüş ümidilə.

Xalq şairi

Nəriman HƏSƏNZADƏ

Ədəbiyyat qəzeti.- 2023.- 16 sentyabr.- S.10.