Tükənməz yalanlar hadisəsi
"Yeni Müsavat" qəzetinə,
"Ədəbiyyat qəzeti"nə,"525-ci qəzet"ə
Bir müddət bundan əvvəl mənim Ermənistanla münasibətlərimiz
barədə teleaparıcı
Tofiq Abbasovla geniş söhbətim
"Youtube"də yerləşdirildi.
Qarabağın tarixindən,
XIX əsrdə ermənilərin
bura köçürülməsindən
bəhs etdiyim söhbətdə erməni
xalqına qarşı
heç bir təhqiramiz söz işlətməmişdim.
Azərbaycanla və Türkiyəylə
normal münasibətlər qurmağın, ilk növbədə,
Ermənistanın xeyrinə
olacağını söyləmişdim.
Amma türklərə, azərbaycanlılara,
o sıradan, Rəsul Rzaya və mənə
qarşı pataloji nifrət bəsləyən
bir sıra erməni yazarları atam və mənim
barəmdə ən iyrənc böhtanları və yalanları yayımladılar.
Bu gün (3 may 2024) "Yeni Müsavat"
qəzetində peşəkar
anarafobun köşə
yazısını oxuyanda
ailəmizə daşnak
münasibətilə bu
köşə yazanının
həmrəyliyinə, əqidə
yaxınlığına təəccüb
qalmadım.
İllər boyu bu ikinci qədim peşə sahibi haqqımızda ancaq yalan ifraz etməklə
məşğuldur. Bir iftirasını
konkret faktlarla ifşa edirsən, heç üstünü vurmadan yenisini uydurur. Hər yalanı da Türkiyə manısının adına
uyğun bir "böhtan hadisəsi" olur. "Manıs" demişkən, bu zatın Rəsul Rzaya və mənə
nifrətini ancaq erməni manısı Kim Kardaşyanın türklərə
nifrətiylə tutuşdurmaq
olar.
Yazır
ki, axır vaxtlar mənim yazılarımı
oxumur. Bu da yalandır.
Hər cümləmi,
hər çıxışımı
pusur və ipini çəkməyəndə
açır gül ağzını.
"Hadisə kimi dissident" kimi andərəbadi adı olan yazısında
bəyan edir:
"Nəsə, qayıdaq, Anar müəllimin son məqaləsinə".
Qayıda
bilməyəcək, çünki
mənim bu adda məqaləm yoxdur. "Yaşamaq haqqı" adlı kitabım var. Bu kitabda görkəmli tarixçi Nəsiman Yaqublu ara qeybətlərinə
deyil, real faktlara və tarixi sənədlərə əsaslanaraq,
Azərbaycanda dissident hərəkatını
təhlil edir. Qəzetlər də həmin parçanı verib. Bu parçada bir yerdə belə mən köşə yazanının
uydurduğu kimi Rəsul Rzanın adını dissident kimi çəkməmişəm. Ümumiyyətlə,
atamın adını
çəkməmişəm. Rəsul Rzanın adı bu yazıda
yalnız Nəsiman Yaqublunun mətnində keçir. Nəsiman yazır:
"Safruh Atalı (Əliyev Elman Ağa oğlu) adlı dissident
1970-ci illərdə şair
Rəsul Rzanın millətçi şeirlərinə
və əsərlərinə
ciddi diqqət yetirib. Xüsusən, onun "Qızılgül
olmayaydı" və
"Yer oğlu"
dissident poemaları yeni düşüncəli
insanlara ciddi təsir etmişdi. Hətta həmin dövrdə R.Rzanın
millətçi əsərlərini
müdafiə edən
bir ziyalılar qrupu da formalaşmışdı".
Nəsiman Yaqublu Rəsul Rzanın Baş redaktorluğu ilə çıxan ilk Azərbaycan
Ensiklopediyası haqqında
da geniş məlumat verir. Bu ensiklopediya ilə sonralar nəşr olunan ensiklopediya arasında müqayisələr apararaq
birincinin milli ruhunu, ikincidə bu ruhun yoxa çıxmasını
əyani misallarla göstərir, birinci ensiklopediyaya Ermənistan Elmlər Akademiyasının
etiraz məktubu göndərməsini də
qeyd edir.
Bu mətnlərdə Anarın
Rəsul Rzanı
dissident adlandırması hardadır?
- Heç yerdə. Ancaq köşə yazarının növbəti
iftirasında. Bu tipik faşist metodudur. Hebbelsin belə yazanlara məşhur tövsiyəsi var: Mümkün
qədər çox yalan deyin, axırda
kimisə inandıracaqsınız.
Rəsul
Rzanın tutduğu vəzifələri, aldığı
mükafatları və
adları danos dəftərində sadalayan
köşə yazanı
həmfikri Sero Xanzadyanın Moskvaya, Sov.İKP MK-ya, SSRİ
KQB-sinə göndərdiyi
danoslarda Rəsul Rzanı qatı millətçi, Lenin milli siyasətinə
düşmən, xunveybin
adlandırırdı. Köşə
yazanımızın yalançılıq
təbi quruyanda gələcək mətnlərində
bu ifadələrdən
də istifadə edə bilər.
Mən Rəsul Rzaya qarşı erməni təxribatlarını konyuktur
dəb xatirinə gətirmirəm. Əbəs
yerə də gətirmirəm, vaxtilə
bir erməni qadın yazıçı
"Rəsul Rzanı
və Anarı özününkülərin əliylə
vuracayıq" demişdi.
Sözü düz çıxmadı. Bizi
"vuranlar" - "özümüzünkülərdən"
deyil, erməni maraqlarına züy tutanlardur.
Bir neçə kəlmə də Azərbaycanda dissidentlik haqda.
Ulu öndər dəfələrlə
qeyd etmişdi ki, Bəxtiyar Vahabzadə, Xəlil Rza, Maqsud və Rüstəm İbrahimbəyovlar,
Anar əsl dissident idilər. Amma biz onları
dissident elan etməyə imkan
vermədik.
Bir də son söz: Həmin bu "Yeni Müsavat" qəzeti və onun həmin
bu köşə yazanı 25-30 il bundan qabaq yazdıqlarına görə hədəfə
aldıqları adamlardan
üzr istəyiblərmi,
ya heç olmasa, "o vaxt belə düşünürdük,
indi belə düşünürük" deyiblərmi? - Yox! Elə bilirlər ki, hamının yaddaşı
korşalıb, hər
şey unudulub gedib.
Qəzetlər durur axı...
Hörmətlə, Anar Rəsuloğlu
3 may
2024
ANAR
Ədəbiyyat
qəzeti.- 2024.- 4 may, №16.- S.5.