Tanıyıram

Bir dədə tanıyıram,

Nur kimi, işıq kimi.

Sevdası millət olmuş,

Vətənə aşiq kimi.

Bir insan tanıyıram,

Ümidənin yarısı.

Ömür sürür hələ də,

Fərrux, Elçin atası.

Bir yazar tanıyıram,

Cahandarın yiyəsi.

Gəlməmiş ki, dünyaya,

Mələk kimi birisi,

Bir abid tanıyıram,

İmranların duası.

Bir zahid tanıyıram,

Zeynəblərin röyası.

Bir nazim tanıyıram,

Şeirə-sözə xiridar.

Bir nasir tanıyıram,

Əsərləri payidar.

Bir sirdaş tanıyıram,

"Ayrı yollar" məftunu.

Bir yurddaş tanıyıram,

Ədəbiyyat məhkumu,

Bir lələ tanıyıram,

Sözü ötkəm, tutarlı.

Bir az belə tanıyıram,

Xatirəmdə dumanlı.

Bir səyyah tanıyıram,

Ana Kürə mayildir,

Onu siz də tanırsınız,

O, Şıxlı İsmayıldır...

Bir azman tanıyıram,

Seyid kimi, şıx kimi.

Bir ozan tanıyıram,

Sözə yaraşıq kimi.

İsmayıl Şıxlıya

Ədəbiyyat qəzeti .- 2025.- 25 iyul (№26).- S.17.