Kimsən, insan?

Kimsən, insan?

Zər qanadlı o böcəkdən,

Mavi, xallı kəpənəkdən,

O çiçəkdən, bu yarpaqdan,

O ağacdan, bu budaqdan,

Yarandığın boz torpaqdan

Fərqin nədi?

Doğulursan, böyüyürsən,

Çoxalırsan, ölürsən...

Bilirsən ki, ölərisən!

Kimsən, insan?

Ağ bənizli dənizlərdən,

Yaşıl donlu meşələrdən,

Quşları sevən səmadan,

Çiskindən, çəndən, dumandan

Fərqin nədi?

Düşüncənmi, sözlərinmi,

Gülüşünmü, yerişinmi?

Düşüncən nəyə yetəndi,

Sözlərin nəyi dəyişən?!

Fərqi varmı o ötəri

gülüşlərin göz yaşından?

Düşün, insan!

Bu sonsuz, tutqun fəzada

Bir nöqtəsən, bir nöqtəsən...

Bir nöqtə sən, bir nöqtə mən...

Bir də sonsuz yad nöqtələr...

Düşün, insan,

Düşünməkçün yaranmısan...

Hicran HÜSEYNOVA

Ədəbiyyat qəzeti. - 2025.- 14 mart (№10).- S.31.