Türkiyədə Rəsulzadəyə həsr olunan kitab təqdim edildi

Azərbaycan mühacirət tarixinin tədqiqatçısı Dilqəm Əhmədin Məhəmməd Əmin Rəsulzadənin doğumunun 140-cı ildönümünə ithaf etdiyi kitabının təqdimat mərasimi keçirilib.

Tədbir Ankarada yerləşən Azaflı Sosial Yardım və Kültür Dərnəyində baş tutub.

Bildirilib ki, Azərbaycan Diasporuna Dəstək Fondunun layihəsi əsasında işıq üzü görən əsər Rəsulzadənin Türkiyə həyatı ilə bağlıdır.

Təqdimatda tanınmış türk ziyalılar iştirak ediblər.

Tədbirdən öncə M.Ə.Rəsulzadə ilə bağlı qısa film təqdim edilib, ardınca təşkilatın sədri vəkil Arzuman Azaflı Rəsulzadənin tariximizdəki yeri barədə məlumat verib.

Daha sonra tarixçi Dilqəm Əhməd sözügedən kitab haqqında danışıb, bu yaxınlarda auksiondan əldə etdiyi Rəsulzadəyə dair nadir fotoşəkli ilk dəfə olaraq təqdim edib.

Ədəbiyyat qəzeti.- 2025.- 14 mart (№10).- S.23.