Birini də mən yazım:

"Hər şey yaxşı olacaq".

Narahat olma, qızım,

Hər şey yaxşı olacaq.

Səngiyəcək küləklər,

Açılacaq çiçəklər,

Bayraqlar və mələklər

Enib, yenə qalxacaq,

Hər şey yaxşı olacaq.

Həyat yoldu, desinlər,

İnsan yolçu, bilsinlər,

Hörmətli sərnişinlər,

Sabah günəş doğacaq,

Hər şey yaxşı olacaq.

Görən, niyə, nədəndi,

İnsan ruhdu, bədəndi?

Bilirəm ki, vətəndi

Növbəti dayanacaq,

Hər şey yaxşı olacaq.

Ölüm haqdı, qorxudu,

Bip-bip nəğmə oxudu,

Həyatımız yuxudu,

Hər insan oyanacaq,

Hər şey yaxşı olacaq.

Bir gün hər şey bitəcək,

Amma dünya dönəcək,

Hamı ölüb gedəcək,

Qəhrəmanlar qalacaq,

Hər şey yaxşı olacaq.

Bu qılıncım, bu sazım,

Adına dastan yazım,

Narahat olma, qızım,

Hər şey yaxşı olacaq.

Elşad BARAT

Ədəbiyyat qəzeti.- 2025.- 17 yanvar, №2.- S.17.