Xarici poeziyadan nümunələr

Yoxdur təbiətdə pis hava, gerçək

Yoxdur təbiətdə pis hava, gerçək,

Hər hava bolluqdur, hər hava nemət.

Yağış, ya qar olsun, - ömrünə gəlcək,

Sevib, şükr edənlər duyar səadət.

Qasırğa qopsa da qəlbdə, ürəkdə,

Tənhalıq möhürü yüksə, kürəkdə,

Yuxusuz gecələr qəm çəkərək də,

Sevib, şükr edənlər duyar səadət.

Bitsə arzu-ümid, kədər bitməsə,

Hər gün artan qəmə gücün yetməsə,

Yazılmış talesə, qismət, hər nəsə,

Sevib, şükr edənlər duyar səadət.

Dəyişər fəsillər, gün doğar, batar,

Sonuncu eşqə də şükr edən çatar.

Dünyadan getdiyin həmin gün ki var,

Sevib, şükr edənlər duyar səadət.

Yoxdur təbiətdə pis hava, gerçək,

Zaman durdurulmaz, ha geriyə çək.

Ömrün payızını, payız fəslitək,

Qəm-qüssə çəkmədən sanasan nemət,

Sevib, şükr edənlər duyar səadət.

Eldar Ryazanov

Dilimizə çevirdi: Zeynəb Cəmaləddin

Ədəbiyyat qəzeti.- 2025.- 24 yanvar, №3.- S.27.