Şotland şairi Robert Börnsün

anım günü keçirilib

Hər il dünyanın bir çox ölkələrində Britaniyanın görkəmli söz adamı, şotland əsilli nəğməkar şairi Robert Börnsün dünyaya gəldiyi 25 yanvar böyük təntənə ilə qeyd edilir. Bu günlərdə Azərbaycanda Britaniya səfirliyinin təşkilatçılığı ilə belə bir tədbir keçirilib. Qeyd edək ki, “Robert Börns: şeir, nəğmə körpüsü və sözlə hörülmüş dünya” kitabının müəllifləri Azərbaycan Dillər Universitetinin professoru Şahin Xəlilli və Azərbaycan Universitetinin rektoru Səadət Əliyeva Azərbaycanda sevilən romantik şairin söz-sənət dünyası ilə yaxından tanışlığın yeni mənəvi körpüsünü yaratmışdır.

Bakıda keçirilən anım günü münasibəti ilə Şotlandiyanın Qlazqo Universitetində Kralın təsis etdiyi professor Nigel Lisk Şahin Xəlilliyə məktub göndərmişdir. Azərbaycandakı Britaniya səfiri Ferqus Auld və tədbir iştirakçılarına səmimi salamını və arzularını çatdıran Nigel Lisk 25 yanvar münasibəti ilə yazır:

“Bu gün biz çox illər üzbəüz gəldiyimiz ən dəhşətli Eovin tufanından təzəcə qurtulub özümüzə gəlirik. Tufan ağacları yerlə yeksan edib budaqlar yollara səpələmişdir. Küləklər təzəlikcə sakitləşmişdir. Bu hadisə mənə 25 yanvar 1759-cu ildə Robert Börnsün dünyaya gəldiyi gündə tüğyan edən tufanı xatırlatdı...”

Şairin böyük qardaşı Qilbert yazdığı xatirələrində həmin gün anasının Robertlə bir həftəlik qonşularının komasında yaşamaq məcburiyyətində qaldıqlarını söyləmişdir. Şotland alimi sonralar da nəğməkar şairin ömrü boyu ağır sınaqlar, çətinliklərlə üzləşdiyini xatırladaraq yazır: “Şair Robert Börns üçün anadan olduğu tufanlı gün onun sonrakı həyatında da üzbəüz gəldiyi çox-çox tufanların, çətin günlərin emblemi olmuşdur”.

Professor Nigel Lisk məktubunu Robert Börnsün nəğmələrinin birində onun gələcək günlərə inamını təcəssüm etdirən misralarla bitirir:

Elə gözəl gün gələcək

Xoş arzuyla güləcəkdir.

Bu dünyada ağıl, şərəf

Onda qalib gələcəkdir.

Və sairə və ilaxır.

Mən görürəm o baharı.

O vaxt qardaş olacaqdır.

Yer üzünün adamları.

Robert Börnsə həsr olunmuş tədbirdə xarici qonaqlarla yanaşı Azərbaycanın tanınmış ziyalıları da iştirak etmişdir.

Ədəbiyyat qəzeti.- 2025.- 31 yanvar, №4.- S.21.