Oraz Yağmur

(Türkmənistan)

Qarabağlı ananın ağısı

Şair dostum Adil Cəmilin anası üçün

Ay, balam,

Vay, balam!

Qarabağın suyundan

İçmək cana ləzzətdi.

Təndirlərin tüstüsü

Buludlara bülənddi.

Sübh çağı gün çıxanda

Yarpaqlar bərq vurardı.

Hamı xoruz banıyla

Saatını qurardı.

Ay, balam,

Vay, balam!

Neyləyim mən qarabaxt,

Qürbətdədir Qarabağ!

Gedib çıxa bilmirəm,

Uzaqdan da yurduma

Dönüb baxa bilmirəm.

Ulu Tanrım əzəldən

Məni xanım yaratmış.

De gəl ki, baxt payımı

Belə yarım yaratmış.

Nə qədər ki, yurdumda

Qan içən düşmən gəzir.

Qəfəsdə bülbül kimi

Mənim ürəyim əsir.

Ay, balam,

Vay, balam!

Ağlayıram yuxumda

Hər görəndə o kəndi.

Ağlamaqdan, can bala,

Gözüm yaşı tükəndi.

Mən bir daha özümə

Gələ bilmərəm, oğul.

Qarabağı görməsəm,

Ölə bilmərəm, oğul!..

Nəsiminin qardaşı

Dünya şöhrətli xanəndə, azərbaycanlı qardaşım Alim Qasımova

Anamın rəhmindən doğuldum,

Baş vurdum Çin səddinə,

Özümə qapı açdım.

Ulduzdan-ulduza çata bilməsəm,

Dolunayın üzünü Sevgilimin saçlarıyla örtə bilməsəm

Nəfəsim kəsilir,

Mənə dünya dar gəlir.

Mən yastıqda

can verənlərdən deyiləm.

Ya isti yar qucağı,

Ya da xain bıçağı

Öldürsə ölənlərdənəm.

Uyumadım gecə-gündüz,

Uymadım qara dünyaya.

Məndə Nəsimi,

Mən də Nəsimi.

Sadəcə dəyişdirdim ismimi.

Aldım nəsibimi:

Mənim də

Dərim soyulur

və hələ canım içimdə.

Gedirsə belə durumda

Dunyanın bu insanlığı

Mən o dünyadan da,

Bundan da

Vaz keçdim.

Hər qapıdan girmərəm,

Pəncərədən çıxmaram.

Yaşasın, yaşasın

quş yuvaları:

Çox olsa belə səf

çəkən qanadlılar

"Hər quş öz

qanadıyla uçmalı!"

Azəri türkcəsinə uyğunlaşdıranı: Adil Cəmil

Ədəbiyyat qəzeti.-2009.-10 aprel.-S.5.