“Yazıçılar Birliyində xərclənən vəsaitə mən cavabdehəm”

Azərbaycanın xalq yazıçısı, Yazıçılar Birliyinin katibi Çingiz Abdullayevin APA-ya müsahibəsindən:

- Siz həm də Yazıçılar Birliyinin maliyyə və təşkilat məsələləri üzrə katibisiniz. Son günlər isə Yazıçılar Birliyində korrupsiya baş verməsi ilə bağlı ittihamlar səslənir.

- Bu fikirlərin hamısı boş və cəfəngiyyatdır. Yazıçılar Birliyində xərclənən vəsaitə mən cavabdehəm. Bir qəpik də olsun başqa istiqamətə pul xərclənsə, bilərəm. Yəni bu yazılanların hamısı axmaq fikirlərdir.

- Rəşad Məcid "Ədəbiyyat qəzeti"nin ayrılan vəsait müqabilində çox aşağı səviyyədə çıxdığını bildirir, hətta qəzetin rəhbərliyinin dəyişdirilməsinin tərəfdarı kimi çıxış edir.

- Məsələnin ədəbi tərəfi mübahisə predmeti ola bilər. Bu qəzetin ənənəsi var. Ola bilər ki, qəzet bir qədər konservativ çıxır. Hesab edirəm ki, "Ədəbiyyat qəzeti" elə belə də qalmalıdır. Biz Yazıçılar Birliyinin ədəbi orqanı olan 3 jurnalı tamamilə gənclərə vermişik. Onlar nə istəyirlər, yazırlar. Bu qəzetin fəaliyyəti kiminsə xoşuna gəlməyə bilər. Mən də istəyərdim ki, "Ədəbiyyat qəzeti" daha cəsarətli çıxsın. İnanmıram ki, bu qəzetin rəhbərliyi tezliklə dəyişdirilsin. Qurultaydan sonra bu barədə fikir ola bilər. Qəzet futbol komandası deyil ki, ancaq cavanlardan ibarət olsun. Qaldı Rəşad Məcidin fikirlərinə, Yazıçılar Birliyində demokratiyadır, istənilən fikir səsləndirilə, hər katibin öz fikri ola bilər.

- Yazıçılar Birliyinin növbəti qurultayı nə vaxt olacaq?

- Artıq sonuncu qurultaydan 5 il keçir. Ola bilər ki, qurultay bu il və ya gələn il keçirilsin.

Ədəbiyyat qəzeti.-2009.-17 aprel.-S.2.