Yazıcılar Birliyi haqqında novbəti uydurmalar

1. Yoxlanılmamış məlumatları ucuz sensasiya xatirinə dərc etməyə alışmış, oxucuya sırıdıqlarının məsuliyyətini daşımayan bəzi qəzetlərdə Birliyin və onun ədəbi orqanlarında guya ki, korrupsiya olması barədə iyrənc şayiələr ədəbiyyatımıza illər boyu çirkab atan adamların muzdlu və tapşırıqlı böhtanlarıdır.

Yazıçılar Birliyinin, onun ədəbi orqanlarının, o cümlədən "Ədəbiyyat qəzeti"nin bütün vəsaiti şəffafdır, xəzinədarlıq tərəfindən müəyyənləşdirilir və nəzarət edilir.

Belə iftiralar yazanlar və yayanlar, eləcə də tanınmış yazıçılar haqqında həyasız təhqirlərə əl atanlar məhkəməyə verilə bilərdi. Amma bu onlar üçün böyük şərəf olardı. İstədikləri də elə odur ki, bu sayaq yaramaz üsullarla ad çıxartsınlar.

2. Başqa bir yalanları da guya kim tərəfindənsə Yazıçılar Birliyindən haqq-hesab tələb edilməsidir. Belə bir şey təbii ki, yoxdur.

3. Yazıçılar Birliyinin rəhbərliyində "Ədəbiyyat qəzeti"nin baş redaktoru Ayaz Vəfalının vəzifəsindən azad edilməsi haqqında heç bir müzakirə olunmayıb və belə bir fikir də yoxdur.

4. "Ədəbiyyat qəzeti"ni tənqid edənlər heç olmasa qəzetin adını düz yazsınlar, "Ədəbiyyat" kimi yazmasınlar.

5. "Bizim yol" qəzetində (14 aprel 2009) növbəti iftiralardan ibarət "Yazıçılar Birliyində mənzil maxinasiyası var?" adlı yazı dərc olunub. Yazı müəllifi dediyi böhtan və yalanlara cavab verməmizi tələb edir. Özü rəsmi şəkildə mətbuat səhifələrində yalançı və böhtançı olduğunu etiraf edən cızmaqaraçının uydurmalarına cavab vermək fikrimiz yoxdur.

6. O ki, qaldı kimlərinsə kimlərinsə ölümünü səbirsizliklə gözləməsi bu, məlum olduğu kimi - mürdəşirlərin - meyit yuyanların peşə arzusudur.

Azərbaycan Yazıçılar Birliyinin

Mətbuat xidməti

14 aprel 2009

Ədəbiyyat qəzeti.-2009.-17 aprel.-S.2.