Sən bir məktəbsən ki...

Böyük Cəlil Məmmədquluzadənin Cəlilabad

şəhərindəki abidəsi önündə

Gəldim

əhvalını soruşmaq üçün,

fikrinə, duyğuna qovuşmaq üçün;

Piyada gələrəm hayanda olsam, -

Səninlə doyunca danışmaq üçün.

Sən bir məktəbsən ki, böyük,

möhtəşəm! -

Hayıf, az görmüşəm, az

götürmüşəm.

Sən sözü ən əziz nemət bilərdin, -

Mən sənə bir ürək söz gətirmişəm!..

Nə söz götürmüsən, nə əyilmisən! -

Mənəvi atamız sən deyilmisən?!

Mən burda anadan olsam da, ustad,

Yenə qonaq mənəm, ev yiyəsi - sən.

Bu torpaq adınla öyünür sənin,

Çalıbdır laylanı Araz, Kür sənin;

Sənin surətindir daşa can verən, -

Heykəldə də qəlbin döyünür sənin.

Ürək bir aləmdir - yanmasa dolmur,

Ürəksiz baxanda görmək də olmur;

Gözdən yaş çıxmayır ürək yanmasa, -

Ürək yanmayanda gülmək də olmur.

Sən öz taleyinlə dünyada təkdin!..

Qəlbin yanmasaydı gülməyəcəkdin.

Biri həsəd çəkdi, biri kef çəkdi,

Sən isə bir xalqın dərdini çəkdin!..

El qəmindən özgə qəmin vardımı?

Qeyrətdir anaya övlad yardımı!..

Böyüklər böyük dərd çəkməsəydilər,

O dərdlər, bəlalar yox olardımı?

Sən bir məktəbsən ki, böyük,

möhtəşəm! -

Hayıf, az görmüşəm, az

götürmüşəm.

Sən sözü ən əziz nemət bilərdin, -

Mən sənə bir ürək söz gətirmişəm!..

Ayaz VƏfALI

10 may 1980

Ədəbiyyat qəzeti.- 2009.- 4 dekabr.- S.3.