İllər, sətirlər

Bu günlər böyük ədibimiz Cəlil Məmmədquluzadənin dünyaya gəlişinin 140 illiyini ölməz sənətkara dərin hörmətlə qeyd edirik. Eyni zamanda Mirzə Cəlil ənənələrindən - “Molla Nəsrəddin” məktəbindən daim öyrənən “Ədəbiyyat qəzeti”nin 75 yaşı tamam olub.

Bir əsrin dörddə üçünə bərabər ötən dövr ərzində Mirzə Cəlilin həyatı, sənəti və şəxsiyyətilə bağlı nə qədər material “Ədəbiyyat qəzeti” salnaməsində məhəbbətlə əks olunub qalıb. Belə unudulmaz mədəniyyət hadisələrindən biri 1980-ci il mayın 10-da ədibin adını daşıyan Cəlilabad şəhərinin girəcəyində ucaldılmış abidəsinin (müəllifi heykəltəraş Rəhim Quliyev) açılışı idi.

Abidənin açılışına Azərbaycan Yazıçılar İttifaqından qonaqlar dəvət olunmuşdu: ədibin görkəmli tədqiqatçısı professor Abbas Zamanov, Yazıçılar İttifaqının katibi Hüseyn Abbaszadə və bu sətirlərin müəllifi.

Mərasimi Cəlilabad Rayon Partiya Komitəsinin birinci katibi İbrahim Qurbanov giriş sözü ilə açdı.

Abbas müəllim, sonra da Hüseyn müəllim çıxış etdilər. Mən ölməz ədibə həsr etdiyim “Sən bir məktəbsən ki...” şerimi oxudum.

Neçə illər “Ədəbiyyat qəzeti”nin (“Ədəbiyyat və incəsənət”) baş redaktoru olmuş, uzun müddət bir yerdə işlədiyimiz və həmişə xeyirxahlığını gördüyüm, təəssüf ki, iki il əvvəl bizi tərk etmiş - “ömründə ilk və son dəfə vəfasızlıq etmiş” Hüseyn müəllimə yazdığım vida sözündən bir neçə sətri xatırlamağı özümə borc bilirəm: “Onun 60-cı illərin ortalarında “Ədəbiyyat qəzeti”nə gəlişinin şahidi oldum, ancaq gedişini görmədim, heç indi də görmürəm. Bu, bəlkə ona görədir ki, Hüseyn müəllim baş redaktorluqdan rəsmən başqa vəzifəyə - məsələn, Yazıçılar İttifaqının katibi vəzifəsinə keçəndə də, sonralar hətta işləməyəndə də “Ədəbiyyat qəzeti”ndən kənarda olmayıb.

...Mən heç şübhə etmirəm ki, onun ruhu öz evi qədər neçə illər ürəyinin hərarətini həsr etdiyi, son nəfəsinə kimi redaksiya heyətinin üzvü olduğu doğma “Ədəbiyyat qəzeti” məkanında da dolanır və dolanacaq...”

“Ədəbiyyat qəzeti” isə, təbii ki, ona ömür sərf edənləri unutmayıb və unutmayacaq.

A.Vəfalı

Ədəbiyyat qəzeti.- 2013.- 4 dekabr.- S.3.