Bölmələrdə: Aran

Yazıçılar Birliyi Aran bölməsinin və rayon Ziyalılar Cəmiyyətinin təşkilatçılığı ilə iyulun 4-də Saatlıda şair-publisist Qənbər Əhmədlinin 60 illik yubileyi qeyd olundu. Mərasimi rayonda çıxan "Dönüş" qəzetinin baş redaktoru, əməkdar mədəniyyət işçisi Qaçay Əhmədov açdı. Tədbirin aparıcısı, bölmənin sədri Sərvaz Hüseynoğlu Q.Əhmədlinin bölgənin ədəbi həyatında fəal iştirakından söz açdı. İlin ən yaxşı müəllimi respublika müsabiqəsinin qalibi, Bəylər kənd orta məktəbinin direktoru Zakir Əminov şairin həyat və yaradıcılığı haqqında məruzə ilə çıxış etdi.

AMEA-nın müxbir üzvü, millət vəkili Nizami Cəfərov, Milli Məclisin deputatı Gülhüseyn Əhmədov, xalq şairi Söhrab Tahir, professor Vaqif Arzumanlı, tanınmış şair İlyas Tapdıq, Azərbaycan Qızıl Aypara Cəmiyyətinin regional koordinatoru Vilayət Muradlı, Sabirabad rayon İcra Hakimiyyətinin humanitar məsələlər üzrə müavini, şair Şahnaz Babayeva, rəssam Sürəyya, əməkdar müəllim, rayon ziyalılar cəmiyyətinin sədri Heydər Heydərov, BDU-nun müəllimi Mübariz Azərbaycanlı, şairlərdən Vəli Xramçaylı, Şahismayıl Adıgünlü, Şəmsi Qoca çıxış edərək ölkəmizdə dövlət səviyyəsində mədəniyyətin, ədəbiyyatın inkişafına göstərilən qayğıdan, bu münasibətin bölgələrdə ədəbi-mədəni həyatın inkişafına təsirindən söz açdılar, Qənbər Əhmədlinin "Taleyin qisməti", "Nahaq qan batmır", "Gomuşçu kəndinin əhvalatları", "Bir ömrün salnaməsi", "Şuşa həmin Şuşadır" və s. kitablarında təqdim edilən əsərlərin vətən, yurd sevgili qayəsindən danışdılar, Saatlı RİH başçısının təbrik məktubu oxundu. Çıxış edənlər yubilyarın rayonun mədəni həyatındakı rolu üzərində xüsusilə dayandılar.

Sonda Q.Əhmədli çıxış edərək tədbirə qatılan ziyalılara, onun yaradıcılığını dəyərləndirən qələm dostlarına minnətdarlığını bildirdi, yeni şeirlərini oxudu.

***

Bölmənin və Ziyalılar Cəmiyyətinin təşkilatçılığı ilə Saatlıda yaşayıb-yaradan şair-publisist Şahismayıl Adıgünlünün də 60 yaşı qeyd olundu. Ümumdünya Qaçqınlar günündə keçirilən tədbirdə Axıska türklərinə qarşı törədilmiş dəhşətli cinayətlərdən söz açıldı, Şahismalıyı Adıgünlünün bir qələm adamı olaraq bu tarixi mövzuya sədaqətli olmasından danışıldı. Saatlı rayon mədəniyyət və turizm şöbəsinin müdiri Azər Həsənov, "Dönüş" qəzetinin baş redaktoru Qaçay Əhmədov, AYB-nin Aran bölməsinin sədri Sərvaz Hüseynoğlu, şairlərdən Qəmbər Əhmədli, Qalib Bayram, Axıska türkləri "Vətən" cəmiyyətinin bölgə rəhbəri Fəzli Əşrəf, əməkdar müəllim Heydər Heydərov, rəssam Sürəyya Zeynalova, Varxan kənd orta məktəbinin direktoru Lətif Məlikov, əməkdar mədəniyyət işçisi, şair Cabir Xalidov yubilyarın yaradıcılıq məziyyətlərindən söz açdılar.

Sonda Ş.Adıgünlü tədbir iştirakçılarına öz minnətdarlığını bildirdi, Axıska türklərinin taleyini qələmə almağın vətəndaşlıq borcu olduğunu vurğuladı.

S.Əsgərli

Ədəbiyyat qəzeti.-2009.-10 iyul.-S.8.