Abidəyə ehtiram

Xırdalan şəhərində üç əsrin şahidi olan, el arasında İmambaxış hamamı kimi tanınan tarixi abidə bərpa olunaraq təyinatı üzrə işləməyə başlamışdır. Özündə Şərq memarlıq üslubunu əks etdirən hamamın yarıdan çoxu torpağın təkindədir. Döşəmədən qızdırılan hamam 1887-ci ildə kənd sakini Məşədi İmambaxış tərəfindən tikdirilmiş, uzun müddət xırdalanlıların və ətraf kəndlərin karına gəlmişdir.

Hamamın sahibi Məşədi İmambaxış repressiya olunaraq 1937-ci ildə sürgün edilmiş, ondan sonra hamam Xırdalan kolxozunun balansına keçirilmiş, ötən əsrin 60-ci illərinin sonuna kimi işləmişdir. Lakin sonradan hamam fəaliyyətini dayandırmış, tədricən uçulub dağılmağa başlamış, içərisi məişət tullantıları ilə doldurulmuşdur. Bu günlər əslən xırdalanlı olan Ağabala Xalıqov öz hesabına hamamı yenidən bərpa etdirmişdir.

Açılış mərasimində Abşeron rayon Mədəniyyət və turizm şöbəsinin müdiri İlham Manafov, Abşeron rayon İcra hakimiyyəti başçısının Xırdalan şəhəri üzrə nümayəndəsi Fikrət Orucov, Azərbaycan Dövlət Mədəniyyət və İncəsənət Universitetinin prorektoru Rafiq Sadıqov, yazıçı-publisist Atababa İsmayıloğlu, Xırdalan məscidinin axundu Hacı Azər və başqaları çıxış edərək hamamın tarixindən söhbət açmış, bərpaçının xeyirxah əməllərini savab bir iş kimi dəyərləndirmişlər. Onlar bildirmişlər ki, vaxtilə kəndin kənarındakı quyu suyu ilə işləyən hamam, eyni zamanda müalicəvi əhəmiyyət kəsb edirdi. Bu su yel, bəzi dəri - zöhrəvi xəstəliklərin əlacı idi. Eyni zamanda saxta, az ayarlı qızıl onun suyunda qaralırdı. Bu səbəbdən zərgərlər xırdalanlılara və ona qonşu kəndlərlə saxta qızıl satmırdılar. Onlar qeyd etmişlər ki, hamamın sahibi Məşədi İmambaxışın övladı olmamışdır. Amma üç əsrin yadigarı olan xeyirxah əməli onu övladdan artıq bir sədaqətlə yaşadır.

A.İsmayıloğlu

Ədəbiyyat qəzeti.-2009.-17 iyul.-S.6.