“Anamsız günlər”

Torpaq elə baxar anam qayıtmaz...

Sənə arxayın oluram,

Torpaq, anama yaxşı bax.

Fərqanə

Torpağa dən düşər, birbaş

göyərər,

Torpaqdan ayrılmaz, sirdaş

göyərər,

Torpağa bulaşan daş da

göyərər,

Anam qayıtmaz…

Yaşıl çəmən tabaq-tabaq

gül açar,

Günəş gülər, şəfəq-şəfəq

nur saçar,

Yuvasına dönən quşlar dil açar,

Anam qayıtmaz…

Bağça-bağlar yenə solar,

saralar,

Güleyşə nar budağından

sallanar,

Qış yetişər, quzeyləri qar alar…

Anam qayıtmaz…

Nəvələri boy-boy olub

böyüyər…

Qızları sünbüldür, oğlanlar

əsgər.

Yola salıb, qarşılayır bu ellər,

Anam qayıtmaz…

2007, oktyabr

Yolun yumulaydı…

Ölüm, göz-qaş oynadın,

Sanki beş-daş oynadın.

Niyə çaş-baş oynadın?

Yolun yumulaydı kaş!

Məhvərindən qopardın,

Bir ananı apardın,

Gücüm çatmır… çapardım…

Əlin yumulaydı kaş!

Gözlərimin önündə,

Çırağımdı sönən də…

Analı günlərim də,

Qaldı daha dünəndə…

Belin qırılaydı kaş!

***

Vaxt hər nəyim vardısa

alıb getdi…

Yurdumu, yuvamı

silib getdi…

Vəfasız dost kimi

Məni yolda qoyub

gözdən itdi…

İndi sağım, solum daşdı, daş…

Nə edərəm mən burda

kövrək qəlbimlə?

Daş üstünə daş qoymağa

Gücüm çatmaz bundan belə…

Özüm daşlaşıram

deyəsən,

Bu dünyanın ürəyində.

Bundan o yana

əbədiyyətdir…

Yanlışlıq…

Xalq şairimiz Rəsul Rzanı oxuyarkən

Qaya ömrümə

Əli külünklü günləri, illəri

Keşikçi qoydum…

Gözlərimdən yuxunu qovan kimi,

Düşmənə olan kini-küdurəti

Qəlbimdən qovdum…

Dostla düşmənin

Gecəylə gündüz,

Zülmətlə işıq kimi

Tən olduğunu unutdum…

Dəryaya yelkənsiz,

Səhraya susuz

Üz tutdum…

Bir ömrü müftə tapılmış

Var-dövlət kimi beləcə

Boş yerə xərcləyib,

Talan edib, dağıtdım.

Sonra da nağıla, əfsanəyə çevirib

Öz-özümü ovutdum…

***

Əsəblərim tarıma çəkilib,

Toxunsan kaman tək inlər…

Bir an gülməz üzümə

kələfə dönən günlər…

Zaman öz axarında…

Dünya fırlanmağında…

Eşitməz səssiz fəryadımı,

özü-özünü dinlər…

Enib, çöküb gözlərimə,

dağları, dərələri bürüyən,

Yurdsuz, yuvasız duman,

çənlər…

Hələ də sağ-solumda…

Ürəyimdə cücərən

Ümid toxumlarını da

acgözlüklə dənlər!..

…Toxunma tarıma

çəkilmiş qəlbimə,

Bir yanıqlı neydi o,

Səssiz, sədasız inlər!..

Bahar Bərdəli

Ədəbiyyat qəzeti.-2009.-17 iyul.-S.4.