Azərbaycan Yazıçılar Birliyinin bəyanatı

Azərbaycan yazıçıları Çinin Sincan - Uyğur muxtar vilayətində son vaxtlar baş verən qanlı hadisələrdən narahatlıq keçirirlər. Bu ərazidə əsrlər boyu yaşayan uyğurlar da çinlilər kimi qədim mədəniyyətə malik xalqdır. Zaman-zaman uyğurlar və çinlilər arasında münasibətlərin gərginləşməsini istəyən qüvvələr bu iki xalqı bir-birinə qarşı qoymağa çalışmışlar. Bu günlərdə Sincan - Uyğur vilayətində baş verən, yüzlərlə insanın ölümünə səbəb olan qanlı hadisələr bizi sarsıtmışdır. Əsrlər boyu bir ərazidə iç-içə yaşayan xalqların bir-birinə qarşı faciəli hadisələrlə nəticələnmiş münaqişəsindən təəssüfləndiyimizi bildiririk.

Biz Çinin dövlət strukturları və hökumətinin bu gərgin məqamlarda məsuliyyətli və təmkinli addımlar atacağına inanırıq. Əminik ki, Çin hökuməti münaqişənin tezliklə normal müstəviyə qayıtması üçün sivil tədbirlər görəcək, zorakılığa səbəb olacaq hadisələrin daha da gərginləşməsinin qarşısını alacaq.

Bakı, 09.07.2009

Ədəbiyyat qəzeti.-2009.-17 iyul.-S.1.