“Qobustan”ın yeni sayı

Bu il "Qobustan" sənət toplusunun yaranmasının 40 illiyi tamam olur. "Qobustan"ın 2-ci sayı da bu münasibətlə yazılan ön sözlə başlayır. Öz yubiley ilində dərgi ona xeyir-dua vermiş görkəmli şəxslərin - Məmməd Arif, Rəsul Rza, Mirzə İbrahimov, Fikrət Əmirov, Mikayıl Abdullayev, Niyazi, Qəmər Almazzadə, Şövkət Məmmədova, Adil İsgəndərov, Rauf Hacıyev və Hökümə Qurbanovanın ürək sözlərini bir daha yada salır. "Qobustan"ın ilk redaktoru Anarın 11-il əvvəl yazdığı "Ömrün "Qobustan" illəri" məqaləsində toplunun yaranma günlərindən və sonrakı 20 illik dövründə baş verən bir çox mühüm məsələlərdən bəhs olunur.

"Qobustan"ın 2-ci sayında görkəmli sənətkarlarımızın yubiley məqalələri də diqqəti çəkir. Onların sırasında görkəmli ədib Cəfər Cabbarlının anadan olmasının 110 illiyi ilə bağlı Gülçin Kazımovanın "Cəfər Cabbarlı və Azərbaycan kino sənətinin təşəkkülü", Ələkbər Salahzadənin "Cəfər Cabbarlı" şeri, tanınmış bəstəkar Asəf Zeynallının 100 illiyinə sənətşünaslıq namizədi Mehriban Əhmədovanın "Həmişəyaşar bəstəkar", XX əsrin ikinci yarısında dramaturgiyamızın yükünü çiyinlərində daşımış İlyas Əfəndiyevin 95 illiyi münasibəti ilə Vəfa Xanoğlanın "Yazıçı üçün dil onun ürəyinin aynasıdır" məqaləsi, Vaqif Səmədoğlunun 70 illiyi ilə əlaqədar "Mühit içində, təpədən dırnağa kimi ümid içində" təbrik sözü və yubilyarın şeirləri, İlqar Fəhminin Çingiz Abdullayevin 50 illiyinə "Çağdaş dedektiv romanlar ustası" və Çingiz Ələsgərlinin "İlham Namiq Kamal - 60" adlı qeydləri var.

Bu sayda musiqi sahəsinə geniş yer verilmişdir. AMEA-ın müxbir üzvü Zemfira Səfərova "Müstəqillik dövründə Azərbaycan musiqisinə bir baxış", Elnur Əhmədov "Süleyman Ələsgərovun "Tarantella" pyesi", İmrus Əfəndiyeva musiqişünas Şəhla Mahmudovaya həsr etdiyi "İstedadlı musiqişünas alim", Mənsum İbrahimov xalq artisti Arif Babayevin yaradıcılığından söhbət açan "Qarabağdan ucalan səs", Elçin Həşimov "Azərbaycan xalq əmək mahnıları", Aydan "Evrovision-2009" məqalələri ilə çıxış edir. Teatr sahəsini isə Turan Şükürovanın "Absurd teatr", Sevda Ağayevanın "Kaspi" qəzetində teatr məsələləri" məqalələri təmsil edirlər.

Sara Oğuz Nəzirovanın "Küləyə söykənmiş palitra". Ziyadxan Əliyevin "Şaxəli yaradıcılıq yolu", Məlahət Nəcəfovanın "Azərbaycanda yaşayış mühitinin yaranması və inkişafını səciyyələndirən əsas mərhələlər" yazıları təsviri sənət və memarlıq barəsindədir.

İmamməddin Zəkiyev "Naməlum "Hesabat"ın məlum mətni" araşdırmasında XV əsrdə Heratda saray kitabxanasının rəisi olarkən Səfər Təbrizinin dövlət başçısına - Teymurun nəvəsi Baysunqur Mirzəyə yazdığı "Hesabat" haqqında məlumat verir və onun mətnini dərc etdirir. "Hesabat"da bir çox sənətkarların adları açıqlanır və onların hansı sahəylə məşğul olması diqqətə çatdırılır.

Mehriban Sultanın "Mənəvi varislik haqqında" məqaləsində isə akademik İsa Həbibbəylinin Cəlil Məmmədquluzadənin əsərlərinin təbliği sahəsindəki xidmətləri açıqlanır. Sənətşünas Səyyarə Namiqqızı "Milli irsin qorunması" araşdırması da dərginin bu sayında yer alıb.

Yeni sayda Ağasəfanın "Şəhərdə" poemasını da oxumaq olar. Jurnalın üz qabığında və son səhifəsində rəssamlardan Tofiq Cavadovun və Rafiq Quliyevin müxtəlif mövzulu işləri verilmişdir.

A.İsmayıloğlu

Ədəbiyyat qəzeti.-2009.-17 iyul.-S.5.