İsmayıl Şıxlı-90

Hörmətli redaksiya!

Ədəbi ictimaiyyətə yaxşı məlumdur ki, görkəmli yazıçımız İsmayıl Şıxlının "Dəli Kür" romanının 1962-ci ildə "Azərbaycan" jurnalında çap olunmuş birinci hissəsi haqqında ilk məqalələrdən birini də mərhum atam, tənqidçi Əhəd Hüseynov yazmışdı. Polemik mövqedən yazılmış bu məqalə o zaman romanın özü kimi birmənalı qarşılanmamışdı.

Son vaxtlarda mən atamın xatirəsinə həsr edilmiş "Əhəd yaşayır" kitabını tərtib etmək üçün onun arxivində ardıcıl çalışmalı oldum. Çoxsaylı materiallar arasında İ.Şıxlının "Dəli Kür" romanı haqqında iki əlyazması mənə çox maraqlı göründü. Mən bu materialları atamın "Dəli Kür" haqqında mətbu məqaləsi ilə tutuşdurdum. 1970-ci ildə qələmə alınmış bu əlyazmaları "Dəli Kür" romanının son variantı haqqında yazılmışdır. Hər iki əlyazmasının oxunuşundan sonra belə qənaətə gəldim ki, atam bu yazılarında romanın ideya-estetik xüsusiyyətlərindən daha geniş söhbət aça bilmişdir.

Düşünürəm ki, fəaliyyət göstərdiyi dövrdə obyektiv, prinsipial və yüksək nəzəri hazırlığa malik tənqidçi kimi tanınan atamın bu əlyazmaları indiki ədəbi mühit və oxucular üçün də maraqlı ola bilər. Buna görə də həmin maqalələrdən birini - “Unudulmaz məktub”u "Ədəbiyyat qəzeti"nə təqdim etmək qərarına gəldim.

Zərnurə Əhədqızı

P.S. Yeri gəlmişkən onu da qeyd edim ki, atamın arxivini araşdırarkən oradan "Ədəbiyyat qəzeti"nin 70 ildən artıq bundan əvvəlki - 30 yanvar 1939-cu il tarixli sayına rast gəldim. Qat kəsmiş səhifələri səliqə ilə qorunmuş doğma qəzetimizin həmin sayında kənd təsərrüfatı qabaqcıllarının toplanışında Səməd Vurğunun çıxışı, həmçinin Həmid Araslının "Əlişir Nəvai" və Orucəlinin "Mir Cəlalın novellaları" məqalələri çap olunmuşdur.

Bu günlərdə redaksiya oxuculara müraciətlə qəzetin xüsusən 1934-1950-ci illər saylarından arxivlərində saxladıqları nüsxələr barədə məlumat verməyi və natamam komplektləri tamamlamağa kömək göstərməyi xahiş etmişdi.

Mən atamın arxivində saxlanılan həmin nüsxəni Azərbaycan Prezidentinin məlum sərəncamı ilə 75 illiyi ölkə miqyasında qeyd olunan "Ədəbiyyat qəzeti"nə məmnuniyyətlə ərməğan edirəm.

Ədəbiyyat qəzeti.-2009.-24 iyul.-S.2.