Ayrıca buraxılıs

Görkəmli ədib İlyas Əfəndiyevin anadan olmasının 95 illiyi münasibətilə "Oğuz eli" qəzetinin ayrıca buraxılışı çapdan çıxmışdır. Qəzetin ilk səhifəsində Azərbaycan Respublikasının sabiq prezidenti Heydər Əliyevin İlyas Əfəndiyevin yaradıcılığı haqqında ürək sözləri və onun görkəmli yazıçının xatirəsini əbədiləşdirmək haqqında 9 mart 2001- ci il sərəncamı verilib. Azərbaycan Respublikasının Prezidenti İlham Əliyevin İlyas Əfəndiyevin 90 illik yubileyi münasibətilə 24 may 2004-cü il sərəncamı da bu sayda öz əksini tapıb.

Ayrıca buraxılışın ilk səhifələrində Nazim Hikmət, Səməd Vurğun, Məmməd Arif, Mehdi Hüseyn, Əli Sultanlı, Cəfər Xəndan kimi səlahiyyətli söz sahiblərinin tanınmış yazıçı və görkəmli dramaturqun yaradıcılığı haqqında vaxtilə dedikləri fikirlər bu sənətkarın qələminin hələ çox-çox əvvəl diqqəti çəkdiyini özündə əks etdirir.

Yazıçının müasirləri olan, bu gün haqq dünyasına qovuşan Süleyman Rəhimov, Mirzə İbrahimov, Mehdi Məmmədov, Kamal Talıbzadə, Hüseyn Abbaszadə, Bəxtiyar Vahabzadə, Əzizə Cəfərzadə, Yaşar Qarayev, Qabil, Həsənağa Turabov, Xəlil Rza Ulutürk kimi sənətkarlar da öz qələm dostlarının yaradıcılığını və şəxsiyyətini yüksək dəyərləndirirlər.

İlyas Əfəndiyev yaradıcılığı dünən olduğu kimi bu gün də diqqəti çəkir, sabah da müasirliyini itirməyəcək. Anarın, Polad Bülbüloğlunun, Sabir Rüstəmxanlının, Şəfiqə Məmmədovanın, Amaliya Pənahovanın, Kamil Vəli Nərimanoğlunun, Kamal Abdullanın, İlham Rəhimlinin, Vilayət Quliyevin, İsmayıl Öməroğlunun, Nahid Hacızadənin və başqalarının xüsusi buraxılışın səhifələrində yer alan fikirləri bu məntiqi bir daha təsdiqləyir. Oxucular bu sayın səhifələrində Nəriman Həsənzadənin, Çingiz Əlioğlunun, Fikrət Qocanın, Zülfüqar Şahsevənlinin, Ramiz Heydərin, Ramiz Məmmədzadənin İlyas Əfəndiyevə həsr etdikləri şeirləri də oxuya bilərlər. Buraxılışda İnsan Doğramacı (Türkiyə) və Doktor Cavad Heyət (İran) kimi dünya şöhrətli şəxsiyyətlər də yazıçı haqqında öz dəyərli fikirlərini bildirirlər.

Xüsusi buraxılışda İlyas Əfəndiyevin yaxınlarının, eləcə də onun ailə üzvləri, qələm dostları, sənət ustaları ilə birgə çəkdirdiyi fotolar da öz əksini tapıb.

Səhifələrarası isə İlyas Əfəndiyevin əsərlərinin müəyyən hissələrini oxumaq mümkündür.

A.İsmayıloğlu

Ədəbiyyat qəzeti.-2009.-24 iyul.-S.6.