5 yaslı "Məhsəti"

Artıq 5 ildir ki, “Məhsəti şairlər məclisi” ictimai birliyinin səyi ilə ilk qadın şairəmiz, gözəl Məhsəti xanımla görüşürük. Əsrlər ardından axıb gələn bir nəfəs, dərin mənalı rübailər aləmi, vətən aşiqi olan bir xanım bizi öz cazibəsində saxlamaqdadır.

Böyük şairəmizi belə unudulmaz edən, onu daha da sevdirən “Məhsəti” jurnalının yaradıcıları olan Fəridə Ləman və Salatın Əhmədli bu istiqamətdə çox iş görürlər.

Bu günlərdə həmin jurnalın beşinci ildönümünə həsr olunan “Məhsəti” ensiklopedik toplusu çap olunaraq məclis üzvlərini və Məhsəti ruhunu şad etmişdir. Topluda jurnal əməkdaşlarının və şairə qadınların fəaliyyəti işıqlandırılır, bu işıqda vətənimizin uzaq ellərdə də bir daha tanınmasından bəhs olunur, Azərbaycanın əziz Məhsəti qızı, böyük Nizaminin müasiri olan, bu gün bizimlə yaşayan ölməz sənətkarı sevdirir.

“Məhsəti” toplusunda çoxlu rəsmlər verilmişdir ki, bunlar ayrı-ayrı yerlərdə keçən məclis görüşləri, tanınmış sənətkarlarla əlaqələr, xaricdə və diyarımızda keçən şeir gecələri barədə yaddaşlardır. Bu yaddaşlar bu gündən və Məhsəti zamanından gələcəyə bir ərməğandır.

Nəfis şəkildə işıq üzü görən toplunu ərsəyə gətirən insanlara təşəkkürlər edir, onlara uğurlar diləyirik. Məclis üzvlərinə isə Məhsəti eşqiylə yazıb-yaratmaq arzulayırıq. Artıq uzaq-uzaq ölkələrdə tanınan “Məhsəti” məclisinə aşiqlərin sayı artmaqdadır. İndi jurnala bir çox ölkələrdən məktublar gəlir. Bu məktublarda sevgi dolu təşəkkürlər, razılıqlar və sevinclər var.

K.Ağayeva

Ədəbiyyat qəzeti.-2009.-24 iyul.-S.6.