Xalqın şairi

…Böyük mütəfəkkir və vətəndaş şair Sabirin… anadan olduğu Şamaxı şəhəri Azərbaycanın ən qədim mədəniyyət mərkəzlərindən biri, Xaqani, Seyid Əzim, Hadi və Səhhət kimi görkəmli mütəfəkkirlərin və şairlərin vətənidir.

…Qısa bir müddət (5 il) ərzindəki qızğın və çox səmərəli ədəbi fəaliyyəti nəticəsində Sabir əsl vətəndaş poeziyanın gözəl nümunələrini yaratmış və zəhmətkeş xalqın məhəbbətini qazanıb şöhrətlənmişdir.

…"Molla Nəsrəddin" jurnalı və onun görkəmli xadimləri olan Cəlil Məmmədquluzadə və Mirzə Ələkbər Sabir bu ideya mübarizəsində çox aydın inqilabi mövqe tutdular, zəhmətkeş xalqın tərəfində dayandılar.

…Sabir bu gərgin mübarizədə öz iti qələmi ilə iştirak edir, ictimai ədalətsizlik üzərində dayanan quruluşun inqilabi yolla dəyişdirilməsinə mane olan hər şeyi ifşa edir, mürtəce qüvvələrin bütün hiylələrini açıb göstərir, köhnəliyi inkar edib dağıdır, ictimai qüsurları məhvedici satiraya tuturdu.

Şərq dillərinə və ədəbiyyatına yaxşı bələd olan Sabir ömrünün axırlarında rus dilini öyrənməyə başlamışdı. Puşkin, Lermontov və Qorki kimi yazıçıların əsərlərini gözəl tərcümə nümunələrində ilk dəfə azərbaycanlı oxuculara çatdıranlardan biri olan istedadlı şair və mütərcim Abbas Səhhətin köməyi ilə Sabir qabaqcıl rus və Qərbi Avropa mədəniyyətini böyük bir məhəbbətlə təbliğ edirdi.

Sabirin poetik istedadının orijinallığı ondadır ki, öz şeirlərində gülüş, istehza və kəskin satiranın gücü ilə bir çox mənfi ictimai tiplərin obrazlarını yaradarkən, öz dərin poetik ideallarını da parlaq surətdə ifadə etmişdir.

Dahi şair belə hesab edirdi ki, sənətkar yalnız real həyatı düzgün və sədaqətlə əks etdirmək yolu ilə öz vəzifəsini yerinə yetirib, xalqa xidmət edə bilər. "Şairəm, çünki vəzifəm budur əşar yazım" misrası ilə başlanan və Sabirin yaradıcılıq proqramı olan məşhur şeri sonralar Azərbaycan ədəbiyyatında ən yaxşı söz sənətkarları üçün bir bayraq olmuşdur.

…Sabir üçün xalqın səadətindən və bu səadət uğrunda fəal mübarizə aparmaqdan böyük və yüksək bir ideal olmamışdır. Məhz buna görə də şair öz xalqının və bütün zəhmətkeşlərin qəlbində əbədi yer tutmuşdur.

Mehdi Hüseyn

Ədəbiyyat qəzeti.-2009.-5 iyun.-S.1.