Xalq yazıçısı Mehdi Hüseynin 100 illik yubileyi qeyd edildi

İyunun 12-də Azərbaycan Dövlət Musiqili Komediya Teatrında xalq yazıçısı Mehdi Hüseynin anadan olmasının 100 illik yubileyinə həsr olunmuş tədbir keçirilmişdir.

Mədəniyyət və turizm naziri Əbülfəs Qarayev mərasimi açaraq vurğulamışdır ki, Prezident İlham Əliyevin müvafiq sərəncamı ilə xalq yazıçısı Mehdi Hüseynin 100 illik yubileyinin layiqincə qeyd olunması istiqamətində ciddi işlər görülmüş, Bakı şəhərində və bölgələrdə ədibə həsr edilmiş silsilə tədbirlər keçirilmişdir.

Yeni dövr Azərbaycan ədəbiyyatının inkişafında istedadlı nasir, dramaturq və tənqidçi Mehdi Hüseynin özünəməxsus yeri olduğunu qeyd edən nazir demişdir ki, o, tarixi və müasir mövzulu bədii əsərlərin bir çox dəyərli nümunələrini meydana gətirməklə yanaşı, peşəkar ədəbiyyatşünas kimi sənətkarlıq və yaradıcılığın nəzəri məsələlərinə dair aktual mülahizələri ilə ədəbi prosesə istiqamət vermişdir.

Azərbaycan Yazıçılar Birliyinin sədri, xalq yazıçısı Anar ədibin ədəbiyyatımızdakı mövqeyindən, zəhmətkeş bir nasir kimi yazdığı ölməz əsərlərdən danışmış və unudulmaz xatirələrini bölüşmüşdür.

Xalq yazıçısı bildirmişdir ki, Azərbaycan ədəbiyyatı tarixində öz yaradıcılığı ilə silinməz iz qoymuş Mehdi Hüseyn tənqid və publisistika sahələrində də qələmini sınamış, əsərləri bir sıra xarici dillərə tərcümə olunmuşdur.

Tədbidə Azərbaycan Milli Elmlər Akademiyasının Nizami adına Ədəbiyyat İnstitutunun direktoru, akademik Bəkir Nəbiyev “Mehdi Hüseynin yaradıcılıq yolu” mövzusunda məruzə ilə çıxış etmişdir.

B.Nəbiyev demişdir ki, Mehdi Hüseyn 1909-cu il martın 22-də Qazağın İkinci Şıxlı kəndində dünyaya göz açmışdır. Orta təhsilini Qazaxda almış, Azərbaycan Dövlət Universitetinin pedaqoji fakültəsinin tarix şöbəsini bitirmiş, sonra Moskva Dövlət Kinematoqrafiya İnstitutu yanında akademiya tipli kinossenaristlər kursunun məzunu olmuşdur.

Bildirilmişdir ki, yığcam, səlis, bitkin povestlərin, dəyərli romanların müəllifi kimi tanınıb-sevilən Mehdi Hüseyn ədəbiyyata çox gənc yaşlarından gəlmişdir. İlk vaxtlar kiçik hekayələr yazan M.Hüseyn sonradan “Tərlan”, “Abşeron”, “Qara daşlar”, “Səhər”, “Yeraltı çaylar dənizə axır” romanlarının müəllifi kimi tanınmışdır. Onun dərc olunmuş ilk hekayəsi “Qoyun qırxımı” adlanırdı. 1930-cu ildə “Bahar suları” və “Xavər” adlı hekayə kitabları ilə oxucuların görüşünə gələn xalq yazıçısı bu ədəbi nümunələrdə zəmanəsinin hadisələrini, insanlarını, onların həyata və hadisələrə, cərəyan edən cari ictimai proseslərə baxışlarını qələmə almış, milli ədəbiyyatımızda nəsr dilinin inkişafında əsərləri böyük rol oynamışdır. Bu əsərlər ədəbi dil normalarını ən yaxşı şəkildə təcəssüm etdirirdi. Həmin əsərlərin dil şirinliyi, obrazlılığı öz şirəsini, dadını-tamını Azərbaycan türkcəsinin canlı xalq dilindən almışdır. Mehdi Hüseynin povest və romanları daim oxucular üçün müasirdir, bəşəridir.

Tədbir ədəbi-bədii kompozisiya ilə davam etdirilmişdir.

Ədəbiyyat qəzeti.-2009.-19 iyun.-S.1.