Gəncə: Nigar Rəfibəyli Poeziya günü

Vətən torpağının iftixarı

"Vətən torpağına iftixar olan Şanlı nəsillərin yadigarıyam" - deyən görkəmli xalq şairimiz Nigar Rəfibəylinin bu poetik deyimi onun iyunun 19-da Gəncədə keçirilən ənənəvi poeziya gününün ruhuna hopmuşdu. Azərbaycan Yazıçılar Birliyi Gəncə bölməsinin 1998-ci ildən davam etdirdiyi, hər il şairin doğum günü ərəfəsində doğma vətənində düzənlənən tədbir yenə N.Rəfibəyli adına 43 saylı orta məktəbdən başladı. Xalq şairinin təhsil ocağının həyətində ucalan abidəsi önünə müəllimlər, şagirdlər, qələm adamları toplaşmışdı. AYB Gəncə bölməsinin sədri, əməkdar incəsənət xadimi, Məmməd Alim XX əsr Azərbaycan poeziyasının görkəmli nümayəndəsi Nigar Rəfibəylinin həyat və yaradıcılıq yolundan danışdı, onun şair, tərcüməçi və fədakar ana, ömür-gün yoldaşı kimi unudulmazlığını vurğuladı.

Yazarlardan Aləmzər Əlizadə, Zaur Quliyev, Suğra İbrahimqızı, Solmaz Şəms, Fəridə Heydərova, müəllimlərdən Əsli Süleymanova, Fazil Kazımov və Validə Salmanova çıxış edərək N.Rəfibəyliyə ünvanladıqları şeirlərini, ürək sözlərini söylədilər. Şagirdlər xalq şairinin şeirlərini oxudular. Abidə önünə gül-çiçək dəstələri qoyuldu. Məktəbin direktoru, şair Xəzangül tədbirin təşkilatçısı AYB Gəncə bölməsinə təşəkkürünü bildirdi.

Nigar Rəfibəyli Poeziya günü axşam şairin Xan bağındakı heykəli qarşısında yüzlərlə insanın iştirakı ilə təntənəli surətdə davam etdirildi. Abidə önünə çoxlu gül-çiçək dəstələri düzüldükdən sonra şair Məmməd Alim tədbiri açaraq şanlı nəsillərin yadigarı, gözəl lirik şeirlərin, bədii tərcümələrin müəllifi Nigar xanımın ədəbiyyatımızın inkişafında xidmətlərindən bəhs etdi, ona ünvanladığı şerini oxudu. Mədəniyyət İşçiləri Azad Həmkarlar İttifaqı Respublika komitəsinin sədri Cəmilə Səttarova, Gəncə şəhər Mədəniyyət və Turizm İdarəsinin rəisi Mina Məlikova hər ilin iyununda keçirilən Nigar Rəfibəyli Poeziya gününün ölməz xalq şairinə sonsuz hörmət və ehtiramın ifadəsi olduğunu vurğuladılar, Nizami yurdunun yetirdiyi sənətkarlar sırasında onun özünəməxsus yer tutduğunu dilə gətirdilər.

Yazarlardan Xəzangül, Aləmzər Əlizadə, Bəxtiyar Yunisoğlu, B.Qarayeva, Elman Eloğlu, Solmaz Şəms, Suğra İbrahimqızı, Oruc Göyçəli, Gənc vətənpərvərlər cəmiyyətinin Gəncə təmsilçisi Elçin Axundov poeziya gününün əhəmiyyətindən söz açdılar, Nigar xanıma həsr etdikləri şeirlərini oxudular. N.Rəfibəyli adına 43 nömrəli orta məktəbin şagirdləri şairin şeirlərini söylədilər. "Göygöl" ansamblının müşayiəti ilə müğənnilərdən Sənəm Hüseynova, İlham Qasımov, Şəhadət Ömərov, Ramin Hüseynov və aşıq İlqar Nəcəfoğlu xalq şairinin sözlərinə bəstələnmiş mahnılarla ədəbi-musiqili məclisin iştirakçılarını salamladılar.

Axırda Rəfibəylilər nəslinin nümayəndəsi, şair Səbuhi Rəfizadə yeni şerini oxudu, Nigar Rəfibəyli Poeziya gününün yüksək səviyyədə keçirilməsinə görə təşkilatçı və iştirakçılara minnətdarlığını bildirdi.

İlhamə Yusifova

Ədəbiyyat qəzeti.-2009.-26 iyun.-S.1.