Ölülər”in ölməzlik ruhu

Naxçıvan Dövlət Universitetində dahi mütəfəkkir, görkəmli yazıçı-publisist Cəlil Məmməquluzadənin 140 illik yubileyi münasibətilə keçirilən silsilə tədbirlər davam etməkdədir. AMEA-nın Naxçıvan bölməsi ilə birgə təşkil olunmuş "Ölülər" tragikomediyası və sənətdə ölməzlik" mövzusunda elmi konfrans isə həm də Azərbaycan teatrı və dramaturgiyası tarixində xüsusi yer tutan bu əsərin yazılmasının 100-cü ildönümünə həsr olunmuşdu.

Konfransı giriş sözü ilə açan rektor, akademik İsa Həbibbəyli Mirzə Cəlili bütün şüurlu həyatını və qələmini xalqının və vətəninin istiqlalına həsr etmiş böyük şəxsiyyət, ədəbiyyatda azərbaycançılıq ideologiyasının banisi kimi dəyərləndirmişdir. Görkəmli mirzəcəlilşünas "Ölülər"in sənət əsəri kimi ölməzliyindən söz açmış, əsəri bütün Şərqin cəhalət və mövhumat əsarətindən xilası davasında atılmış güclü atom bombası kimi qiymətləndirmiş, "Ölülər"in ideya-bədii məziyyətlərindən danışmışdır.

Sonra universitetin tədris işləri üzrə prorektoru, əməkdar elm xadimi Hüseyn Həşimli "Ölülər və ədəbi-ictimai mühit", NDU-nun Azərbaycan ədəbiyyatı kafedrasının müdiri, filologiya elmləri doktoru, professor Əsgər Qədimov "C.Məmmədquluzadənin "Ölülər" əsərində İsgəndər obrazının prototipləri", AMEA-nın Naxçıvan bölməsi İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyev "Ölülər" əsərinin dili və üslubu", NDU-nun Azərbaycan ədəbiyyatı kafedrasının dosenti, filologiya elmləri namizədi Əbülfəz Əzimli "C.Məmmədquluzadənin "Ölülər" tragikomediyası ədəbi tənqiddə", AMEA-nın Naxçıvan bölməsi İncəsənət, Dil və Ədəbiyyat İnstitutunun Musiqi və teatr şöbəsinin müdiri, sənətşünaslıq namizədi Əli Qəhrəmanov "Ölülər" Naxçıvan səhnəsində" mövzularında məruzələr etmişlər.

Konfransda Cəlil Məmmədquluzadənin həyatı və yaradıcılığına aid kitab sərgisi və slayd nümayiş etdirilmişdir.

Naxçıvan Dövlət Universitetinin Tələbə Teatr Studiyasının "Ölülər" tamaşası Naxçıvan MR Gənclik Mərkəzində Naxçıvan MR Ali Məclisinin sədri Vasif Talıbovun, Muxtar respublika ziyalılarının, ədəbi-ictimai mühitinin iştirakı ilə göstərilmişdir. Qeyd edək ki, tamaşanın elmi məsləhətçisi universitetin rektoru, akademik İsa Həbibbəyli, baş rejissoru mədəniyyətşünaslıq ixtisası üzrə baş müəllim, Azərbaycan Respublikasının əməkdar mədəniyyət işçisi Gülxarə Əhmədova, quruluşçu rəssamı təsviri incəsənət ixtisası üzrə müəllim Cavid İsmayılov, musiqi tərtibatçısı universitetin müəllimi Əşrəf Mehdiyevdir. Tamaşadakı bütün rolları universitetin ayrı-ayrı fakültələrində təhsil alan tələbə-aktyorlar ifa edirlər.

Naxçıvan MR Ali Məclisinin sədri yaradıcı heyəti uğurlu tamaşa münasibətilə təbrik edərək tələbə aktyorlara yeni yaradıcılıq uğurları arzulamış, əsərin aktuallığından bəhs etmişdir.

Mehriban Sultan

Ədəbiyyat qəzeti.-2009.-26 iyun.-S.4.