KİV və ədəbiyyat

Bu da bunlar

"Alma" qəzetində (19-25 aprel 2009) "Yeddi yazar istərəm…" başlığı altında əlamətdar mətn dərc olunmuşdur. Yazıda yeddi "əhli-qələm" haqqında ifşaedici məlumatlar yer alıb. Onlardan bəzilərinin illər boyu əsas "yaradıcılıq" fəaliyyəti Yazıçılar Birliyinə və onun ədəbi orqanlarına böhtan və çirkab atmaqdan, yüz cür yalanlar və iftiralar uydurmaqdan ibarətdir. Oxucularımız yaxşı bilir ki, qəzetimizin səhifələrini ləkələməmək üçün heç vaxt belələrinin adlarını çəkmirik. Amma indi bunları daha yaxından tanıyan "Alma" qəzetinə isnad edərək, yeddi nəfərdən bəzilərinin "nə yuvanın quşu" olmaları barədə ədəbi ictimaiyyəti agah etməyi lazım bildik.

Yeddi nəfərdən ikisi qadındır. Xalqımızın, ədəbiyyatımızın mənəvi dəyərlərinə sadiq qalaraq, "Ədəbiyyat qəzeti"nin ədəb ənənələrinə riayət edərək iki qadın haqqında yazılanları səhifələrimizə çıxarmırıq.

Kəskin tənqid və ifşa hədəflərindən biri şair Aqşindir. Arabir müasir ədəbiyyatımıza haqsız iradlar tutsa da, biz Aqşini istedadlı gənc hesab edirik. Bədxahlarımızdan fərqli olaraq biz istedadı qiymətləndirməyi bacarırıq. Ümid edirik ki, Aqşin öz istedadının məsuliyyətini də duyacaq və iddialı istedadsızlardan aralanıb həqiqi sənət yoluyla addımlayacaq. Odur ki, onun haqqında "Alma"da yazılan sərt ifadələri burda təkrarlamırıq.

O birilərə gəldikdə "Alma" qəzeti Seymur Baycanı belə səciyyələndirir:

"Üç dırnaqarası romanın müəllifi olan bu dırnaqarası publisist özünün və başqa müəlliflərin yazılarının dəfələrlə ora-burasını dəyişib, təkrar-təkrar öz imzası ilə çap etdirməklə məşhurdur. Bunu kişi kimi etiraf etsə dərd yarıdır, amma dəhşətli dərəcədə kompleksli olan yoldaş Baycanın boynuna belə şeyləri qoymaq olmaz…

Heç vaxt oxucu məktublarına cavab yazmaz, çünki öz istedadına bələd olan Seymur bilir ki, fərli adam onun yazılarından xoşlanmaz. Xəstəlik dərəcəsində xəsis adamdır. Hələ bir yerdə manat xərclədiyini görən olmayıb. Özü də elə bilir ki, qələmindən çıxan iki sətri oxuyan hər bir adam onun cibinə pul basmağa borcludur".

"Alma" qəzeti Elnur Astanbəylinin portret cizgilərini belə təqdim edir: "Nə sərbəst şeri, nə də aşıq şerini yarıtmayan bu adam publisistikada da böhtan ustası kimi məşhurdur. Kiməsə böhtan atmaq, kiminsə üzünə durmaq onun həyat və yaradıcılıq tərzidir. Bundan o qədər həzz alır ki, şər-böhtan xarakterli nəsə deyəndə gözlərinə işıq, üzünə nur gəlir. Həftəlik yazısının planını tutanda özünə adətən "bu dəfə nədən yazım?" sualını deyil, "bu dəfə kimi şərləyim?" sualını verir. Şər atmaq məsələsindəki istedadını ədəbi mətndə göstərə bilsəydi "Nobel"i Orxan Pamukun əlindən asanlıqla alardı. Hətta problemli səhhətini də həkim və dərmanların köməyi ilə deyil, kimlərəsə şər atmaqla bərpa edir. Böhtanlardan əlavə Elnur Astanbəyli dəhşətli dərəcədə qorxaq adamdır. "Razborka", dava-dalaş, sərt mübahisə kimi şeylərə qəti başını soxmaz. Bəd ayaqda dostunu davada qoyub, dabana tüpürüb qaçar. "Astanbəyli" təxəllüsünə belə sadiq qalmasının təməlində doğulduğu kəndə sevgi-filan deyil, həmyerlilərinin qonaqlıqları dayanır".

Bu da "Alma" qəzetində Qan Turalının təqdimatı:

"Əlli qram pivə içəndən sonra özünü itirir və qatıqlamağa başlayır. Yaşlı ya cavan, fərqi yoxdu, özünü bütün yazarlardan ağıllı, savadlı və istedadlı bilir. fəlsəfəni beş barmağı kimi bilsə də tabeli mürəkkəb cümlə yazmaqda çətinlik çəkir və Kamil Vəli Nərimanoğlu başda olmaqla, hamını savadsızlıqda ittiham edir".

"Alma" qəzetinin şef redaktoru Zahir Əzəmətin özü haqqında da tənqid ruhlu məlumat verilib və buna görə bütün başqa yazılanların da obyektiv gerçəklik olduğuna inanmamaq olmur.

P.S. Belə məlum olur ki, bu mətinlərin dərc olunduğu "Alma” qəzetinin şef redaktoru Zahir Əzəmət "ifiralar çempionu" Elnur Astanbəylinin yalançılığına gizli həsəd çəkirmiş. Həmin qəzetin 26 aprel - 2 may sayında şef redaktor "Ədəbiyyat qəzeti"nin büdcəsi haqqında təkzib olunmuş uydurmaları bir daha təkrar edir, Yazıçılar Birliyinə çirkin böhtanlar atır və şərçi olduğunu iftixarla etiraf edərək E.Astanbəyliyə "hamını şərləməkdə mənim səndən nəyim əysikdir" - demək istəyir.

P.P.S. Vaxtilə Yazıçılar Birliyinin büdcə xərcləri haqqında yalan məlumatları müxalifət mətbuatına ötürən Akif Əli adlı bir hökumət məmuru da fürsəti fotə verməyib, böhtançılar yarışına qoşuldu. Vaxtilə uydurmalarına görə Yazıçılar Birliyi sıralarından qovulmuş bu adam ümid edir ki, Birliyin rəhbərliyi dəyişsə, onun da adı 37-ci ilin repressiya qurbanlarının xatirə lövhəsinə yazılacaq. Amma unudur ki, o vaxt da, indi də böhtan və şər atan danosçuların adı başqa bir siyahıya - tarixin qara siyhısına düşür.

Ədəbiyyat qəzeti.-2009.-1 may.-S.7.